Ef þú ert að fara að grafa, plægja eða vinna aðra jarðvinnu á svæði þar sem jarðstrengir eða vatnslagnir gætu leynstu - þá er best að byrja á því að skoða kortasjána okkar. Þar getur þú séð hvort einhverjar lagnir liggja nálægt og fengið yfirsýn áður en þú grefur. 

Mundu samt að kortasjáin segir ekki til um nákvæma legu strengjanna. Hún er frábær til að skoða en ekki nóg til að moka. Þess vegna bjóðum við upp á ókeypis sónun til að staðsetja strengi og lagnir nákvæmlega og til að þú getir framkvæmt án þess að rekast á eitthvað sem gæti kostað mikið að laga. 

Í þéttbýli er þetta einfalt: Alltaf ætti að sækja um sónun áður en jarðvinna hefst.

Í dreifbýli þarf að sækja um sónun ef kortasjáin sýnir að strengir eða lagnir liggja nærri framkvæmdasvæðinu. 

Og svo er það þetta praktíska: Ekki láta líða of langan tíma frá sónun og þar til framkvæmdir hefjast þar sem merkingar geta dofnað eða skolast burt. 

Grafðu með gát

Þótt búið sé að sóna og finna strengi í jörð þarf samt sem áður að gæta sérstakrar varúðar. Best er að handmoka nálægt strengjum. Við áskiljum okkur rétt til að vera með spennuvörð á staðnum þegar grafið er. Í stærri verkefnum getur Rarik jafnframt krafist þess að framkvæmdaaðili greiði fyrir spennuvörslu. 

Tjón á lögnum kostar

Árlega verða fjölmargar skemmdir og truflanir á rafmagnsafhendingu hjá okkur vegna þess að verktakar eða lóðareigendur grafa í strengi. Ef lagnir skemmast við framkvæmdir er það á ábyrgð verktaka og Rarik innheimtir kostnað við þá viðgerð. Ef viðskiptavinir lenda í óþægindum eða tjóni af þessum sökum getur sá kostnaður einnig lent á framkvæmdaraðila. 

Óskaðu eftir sónun áður en þú stingur niður skóflu - það margborgar sig.