Gátlisti vegna umsóknar um rafmagn (heimtaug)

Áður en sótt er um heimtaug þá þarftu að vera með samning við löggiltan rafverktaka sem mun annast raflagnir í byggingunni. Við mælum með að þú ráðfærir þig við hann áður en þú fyllir út umsókn um heimtaug og hafir neðangreind atriði í huga:

• Stærð heimtaugar sem sótt er um. Athugið að þessar upplýsingar eiga að vera á þeim raflagnateikningum sem fylgja umsókninni.
• Þarftu varanlega eða bráðabirgðaheimtaug? Með bráðabirgðaheimtaug er átt við heimtaug sem fjarlægð er að verki loknu. Gjald fyrir hana dregst ekki frá gjaldi fyrir varanlega heimtaug ef sótt er um slíkt síðar.
  
  • Bráðabirgðaheimtaugar eru aflagðar innan 24 mánaða frá tengingu þeirra.
  • Ef sótt er um bráðabirgðaheimtaug meðan á bygginu húsnæðis stendur og ef ætlunin er að sækja síðar um varanlega heimtaug, þá viljum við benda á að það getur verið hagkvæmara að sækja um nýja heimtaug og sækja svo um færslu heimtaugar þegar sá tími kemur. 
  • Ef sótt er um bráðabirgðaheimtaug á byggingarlóð þá er afhendingarstaður Rarik við lóðarmörk en ef óskað er eftir bráðabirgðaheimtaug fyrir tímabundna starfsemi (t.d. matarvagna eða slíkt) þá er afhendingarstaður Rarik við næsta götuskáp eða dreifistöð.   

Ef verið er að sækja um nýja heimtaug í stað bráðabirgðaheimtaugar og sótt verður um flutning heimtaugar síðar þá biðjum við um að settar séu upplýsingar um það í athugasemdarreit þar sem fram kemur hvað standi til. Sendu inn fylgigögn sem sýna bæði núverandi ósk um tengingu og fyrirhugaða framtíðartengingu.  Þá er hægt að hanna heimtaugina þannig að kostnaður verði í lágmarki. 

• Hver er fjöldi fyrirhugaðra mæla? Venjulega er einn mælir á heimtaug en ef um er að ræða fjölbýli, þá gætu þeir verið fleiri.
• Upplýsingar um rafverktaka:  Þú þarft að fylla út nafn, kennitölu, netfang og símanúmer rafverktaka. Athugaðu að óskað er eftir hans persónulegu kennitölu. 
• Teikningar. Þú þarft að skila inn teikningum sem hluta af umsókninni (ekki heilum teikningasettum). Ef þú ert ekki viss hvaða teikningum þú átt að skila inn, mælum við með að þú heyrir í fagmanni. 

Fyrir varanlega heimtaug þarf að skila inn eftirfarandi gögnum:

• Teikningar sem sýna afstöðumynd, málsetta grunnmynd og snið sem sýna hvar lagnir koma inn í hús.  
• Einlínumynd af rafmagnstöflu og mælakassa ef hann er til staðar. 
• Ef sótt er um 5 mæla eða fleiri þarf einfalda útlitsmynd af mælatöflu. 
• Ef sótt er um heimtaugar sem eru 315 amper (A) eða stærri þarf einnig að hafa eftirfarandi fylgiskjöl: 
  - Afláætlun 
  - Einfalda útlitsmynd af mælatöflu. 
• Ef sótt er um heimtaugar sem eru 400 amper (A) eða stærri mun Rarik óska eftir skammhlaupsútreikningum þegar hönnun verks er hafin. Ekki þarf að skila þeim inn með umsókn. 

Fyrir bráðabirgðaheimtaug þarf að skila inn:

• Afstöðumynd sem sýnir hvar á að tengja heimtaugina. 
• Stöðuleyfi: Ef sveitarfélagið gerir kröfu um stöðuleyfi fyrir þá starfsemi sem bráðabirgðaheimtaugin er ætluð fyrir, þarf að skila því inn og er það staðfesting á að Rarik má leggja lagnir á svæðinu. 

• Heimilisfang verkstaðar, landnúmer og póstnúmer. Hægt er að sækja upplýsingar beint í fasteignaskrá í skráningarforminu. Ef þessar upplýsingar eru ekki til þá er hægt að staðsetja verkstað á korti eða setja inn hnit.
• Orkukaupandi: Nafn greiðanda, kennitala, farsímanúmer og netfang. Athugið að greiðandi er sá aðili sem verður skráður fyrir heimlögninni. Mikilvægt er að skráður greiðandi sé í viðskiptasambandi við söluaðila rafmagns. Sé söluaðili rafmagns ekki valinn eða tilgreindur er ekki hægt að spennusetja heimtaugina. Viðskiptasamband söluaðila er alltaf á móti kennitölu einstaklings, ekki hjóna eða sambýlisfólks. 
• Nafn tengiliðar í verkefninu, símanúmer og netfang. Athugið að tengiliður er sá aðili sem Rarik verður í sambandi við hvað varðar útfærslu og framkvæmd verksins. 

Kynntu þér kostnað við tenginguna og athugaðu að ekki er spennusett fyrr en greiðsla hefur borist. Í gjaldskrá fyrir tengigjöld rafmagns (í kafla 1 fyrir þéttbýli og kafla 2 fyrir dreifbýli) eru upplýsingar um kostnað við að fá heimtaug. 

Að gefnu tilefni viljum við minna á að frá og með 15. október og til 1. apríl bætist vetrarálag ofan á allan kostnað vegna jarðvegsframkvæmda. Við hvetjum fólk í framkvæmdahugleiðingum til að senda inn umsóknir fyrir þann tíma til að sleppa við aukakostnað. Jarðvegsvinna að vetri til er bæði erfiðari og kostnaðarsamari en á sumrin vegna ýmissa þátta, t.d. frosts í jörðu, snjóalaga, veðurs sem tafið getur framkvæmdir og stutts birtutíma. Því bætist viðbótargjald ofan á fastan kostnað vegna heimlagna yfir vetrartímann. Frá og með 15. október og til 1. apríl bætast 7.500 krónur m.vsk. ofan á hvern lengdarmetra sem Rarik þarf að leggja í jörð utan lóðamarka viðskiptavinar umfram 25 m, grunngjald er alltaf 187.500 kr. m.vsk. Um jöfnunargjald er að ræða fyrir allt landið til að jafna út þann kostnaðarauka sem fellur til vegna ofangreindra ástæðna. Aukakostnaður getur orðið verulegur og er í mörgum tilfellum mun hærri en sem nemur þessu álagi. Við hvetjum viðskiptavini, sem eiga þess kost, til að seinka vinnu við heimtaugar fram yfir 1. apríl til að spara mögulega óþörf útgjöld og sækja tímanlega um heimlagnir fyrir sumartímann.

Ef heimtaug fer yfir land í eigu annarra þá berð þú ábyrgð á að útvega leyfi þess landeiganda. Rarik getur upplýst um hvort þú þarfnast þessa leyfis og mun einnig útvega form sem hægt er að nota.  

Þú þarft að leggja, á þinn kostnað, 50 mm plaströr (ekki barka) fyrir heimtaugarstreng út fyrir lóðamörk eða að lágmarki 20 m frá byggingunni í samráði við Rarik. Öll jarðvinna innan lóðarmarka er í þinni umsjá eða verktaka á þínum vega. Lagnaskurður þarf að vera 70 cm djúpur.