Uppfærð frétt: Lækkun gjaldskrár, ný þéttbýlisgjaldsvæði og breytt jöfnunargjald

07.01.2026

Frá og með 1. janúar 2026 lækka allir gjaldaliðir Landsnets í gjaldskrá fyrir flutning og dreifingu raforku um 8,5%. Samtímis taka gildi lagabreytingar sem hækka jöfnunargjald og þrjú ný svæði bætast við þéttbýlisgjaldskrá okkar; Bifröst, Borg í Grímsnesi og Tjarnabyggð. 
Fréttin var uppfærð 7. janúar 2026.

Lækkun á gjaldaliðum Landsnets kemur í kjölfar þess að Landsnet tilkynnti nýlega um 8,5% lækkun á gjaldskrá flutnings til dreifiveitna sem tekur gildi þann 1. janúar 2026. Gjaldskrárbreytingar hjá Rarik endurspegla eingöngu þessa breytingu. Hækkun varð á gjaldskrá Landsnets í mars 2025, vegna dóms Hæstaréttar um innmötunargjald. Það er því gleðiefni að sjá þá hækkun ganga til baka nú, nokkrum mánuðum fyrr en áætlað hafði verið.

Þrjú ný þéttbýlisgjaldsvæði

Bifröst, Borg í Grímsnesi og Tjarnabyggð teljast nú til þéttbýlisgjaldsvæða í gjaldskrá Rarik fyrir dreifingu og flutning rafmagns, þar sem íbúafjöldi á ofangreindum svæðum er nú kominn yfir 200 manns samkvæmt skráningu Hagstofu Íslands. Við óskum þeim innilega til hamingju með fjölgunina.
Viðskiptavinir okkar á þessum þremur stöðum sem ekki eru komnir með snjallmæla eru beðnir um að senda okkur álestur sem fyrst til að þessar breytingar, frá dreifbýlistaxta yfir á þéttbýlistaxta, komi strax fram á þeirra reikningum. 

Viðskiptavinir okkar á Bifröst, Borg í Grímsnesi og í Tjarnabyggð geta haft samband við þjónustuver okkar ef þeir hafa spurningar varðandi nýja taxta eða álestur. Sérfræðingar okkar taka vel á móti öllum spurningum og eru með svör á reiðum höndum.

Breyting á jöfnunargjaldi - Uppfært 07.01.2026

Undir lok árs 2025 voru samþykkt lög um breytingar á ýmsum lögum um skatta, gjöld o.fl., þar á meðal breytingar á lögum um jöfnun kostnaðar við dreifingu á raforku. Breytingin felst í stuttu máli í því að fjárhæð jöfnunargjalds hækkar úr 0.41 kr. á hverja kílóvattstund í 0.52 kr. á kílóvattstund fyrir tryggða orku, og úr 0,13 kr. í 0,17 kr. fyrir skerðanlegan flutning orku. Að auki var sett inn breyting sem kveður á um að rafkyntar hitaveitu séu undanþegnar jöfnunargjaldi. Verðskrá okkar hefur verið uppfærð og endurútgefin til að endurspegla breytingu á lögum (37.gr.) sem samþykkt voru á Alþingi 24. desember sl. og tóku gildi 1. janúar 2026.

Jöfnunargjaldið er sameiginlegur pottur sem síðan er nýttur til að greiða dreifbýlisframlag til raforkunotenda í dreifbýli en það er mikið réttlætismál fyrir viðskiptavini okkar. Við væntum þess að hækkun dreifbýlisframlags fylgi í kjölfar hækkunar á jöfnunargjaldi.