Við einföldum ferli við tengingu minni virkjana

Smávirkjanir undir 140 kW  

Smávirkjanir undir 140 kW (200A) greiða hér eftir tengigjald samkvæmt almennri tengigjaldskrá Rarik.  

• Viðskiptavinur sem þegar er tengdur Rarik og hyggst setja upp virkjun allt að 140 kW greiðir ekki tengigjald ef núverandi heimtaug ræður við fyrirhugaða vinnslu.  
• Ef stækka þarf heimtaug, þarf eingöngu að sækja um stækkun og greiða fyrir samkvæmt tengigjaldskrá Rarik.

Fram til þessa hefur hver og ein tenging verið metin sérstaklega út frá arðsemi hennar. Með breytingunni er ferlið einfaldað og gert skýrara fyrir viðskiptavini sem vilja koma upp smærri virkjunum.

Nýtt gjald fyrir tengisamninga 

Tekið verður upp nýtt gjald fyrir tengisamninga og verður það 100.000 kr. m. VSK, sem gengur upp í tengigjald virkjunar ef af henni verður.

• Tengisamningur er nauðsynlegur þegar sótt er um virkjunarleyfi en fellur sjálfkrafa úr gildi að samningstíma loknum ef ekki verður af virkjun.  
• Við gerð tengisamningsins gerum við ráð fyrir virkjuninni í okkar áætlunum, meðal annars með því að taka frá afl í kerfi Rarik fyrir viðkomandi virkjun. Með vaxandi fjölda virkjanaverkefna hefur verið ákveðið að setja hóflegt gjald á tengisamninga. Eins og áður segir gengur þetta gjald upp í tengigjald viðkomandi virkjunar ef af henni verður. 
• Ofangreint ákvæði á einungis við um virkjanir sem eru yfir 100 kW og þurfa að sækja um virkjanaleyfi.

Það er markmið okkar að auka skilvirkni og einfalda ferla þegar kemur að tengingum minni virkjana, sem og að bæta upplýsingaflæði til virkjunaraðila.  

Við bendum öllum áhugasömum á að skoða virkjanasíður Rarik þar sem finna má leiðbeiningar um ferlið gagnvart Rarik fyrir ólíkar stærðir virkjana, hvort sem ætlunin er að framleiða eingöngu til eigin nota, setja upp smávirkjun undir 100 kW eða tengja virkjun á bilinu 100 kW-9,9 MW.