Við aukum aflið á Norðurlandi

02.09.2025

Þessa vikuna er mikið um að vera við aðveitustöð okkar við Laxárvatn í Húnabyggð. Á mánudag var hafist handa við að stækka spenna í aðveitustöðinni og tengja inn nýja jarðstrengi.

Aðveitustöðin við Laxárvatn hefur gengið í gegnum miklar endurbætur í sumar. Mynd: Bernhard Kristinn

Stækkun spenna og styrking dreifikerfisins er liður í því að auka afhendingargetu okkar og afhendingaröryggi á svæðinu en mikil eftirspurn er eftir raforku á þessum slóðum, sérstaklega fyrir hleðsluinnviði. Eftir stækkunina mun afhendingargeta okkar frá Laxárvatni aukast úr 3,5MW í 6,5MW og það munar svo sannarlega um minna. Við notum tækifærið og tengjum inn nýjan jarðstreng fyrir Skagaströnd sem koma mun í stað gömlu Skagastrandarlínunnar. Einnig mun bætast við nýr 11kV strengur inn á Blönduós en hann var boraður undir ána Blöndu fyrr í sumar.

Það er nóg að gera við að tengja nýja strengi og spenna við Laxárvatn. Mynd: Bernhard Kristinn

Hér er um stórt verkefni að ræða sem tekur nokkra daga að ljúka. Meðan á þessari aðgerð hefur staðið hefur meirihluti Húnabyggðar fengið rafmagn frá aðveitustöðinni í Hrútatungu um 19kV kerfi en Skagaströnd og gamla Skagabyggð verið tengd við 11kV kerfi frá Laxárvatni auk þess sem varaaflsvél hjálpar til þegar notkunin er mikil.

Framkvæmdaflokkar okkar á Norðurlandi hafa unnið hratt og örugglega svo rask verði sem minnst fyrir íbúa á svæðinu og munu ná að ljúka við að tengja allt degi fyrr en upphaflega var áætlað. Aðgerðinni lýkur því í nótt, aðfaranótt fimmtudagsins 4. september, en þá verða Húnaþing og Skagaströnd aftur tengd við aðveitustöðina við Laxárvatn.