Vel heppnuð heimsókn á Austurland

25.09.2025

Stjórn og framkvæmdastjórn Rarik heimsótti Austurland dagana 22.-24. september s.l. og kom einnig við á austasta hluta Norðurlands. Tilgangur ferðarinnar var að kynna betur starfsemi okkar og fjölbreytt verkefni í landshlutanum og treysta samstarf og samskipti við sveitarstjórnir og stóra viðskiptavini á svæðinu.

Ferðin hófst á Höfn í Hornafirði og síðan lá leiðin á Reyðarfjörð, Norðfjörð, Neskaupstað, Eskifjörð, Egilsstaði og Vopnafjörð og endaði loks á Þórshöfn. Fundir voru haldnir með fulltrúum sveitarstjórnar Hornafjarðar, Fjarðabyggðar, Múlaþings, Fljótsdalshrepps, Vopnafjarðar og Langanesbyggðar auk þess sem kúabúið Flatey, Síldarvinnslan í Neskaupstað og Ísfélagið á Þórshöfn tóku vel á móti okkar fólki. Farnar voru skoðunarferðir í hitaveituna í Hoffelli, aðveitustöðina við Teigarhorn og Lagarfossvirkjun Orkusölunnar.

Árlega heimsækja stjórn og framkvæmdastjórn okkar einn landshluta í senn. Þannig viljum við tryggja það að við fáum að hlusta á fulltrúa sveitarfélaga og viðskiptavina um allt land og heyra hvaða mál brenna á þeim þegar kemur að orkudreifingu og orkuskiptum. Að sama skapi gefst okkur tækifæri til að kynna starfsemi Rarik betur, ræða verkefni fyrirtækisins og stöðu dreifikerfisins. Hlutverk Rarik og ábyrgð þegar kemur að uppbyggingu og orkuskiptum á landsbyggðinni er gríðarstórt og við tökum því mjög alvarlega. Það er okkur mikið kappsmál að eiga góð samskipti og samstarf við sveitarstjórnir og fyrirtæki á okkar dreifisvæði og veita þeim framúrskarandi þjónustu. Heimsóknir og fundir sem þessir eru okkur því gríðarlega mikilvægir.

Við sendum sérstakar þakkir til allra þeirra sem tóku á móti og komu til fundar við okkur á meðan á ferð okkar stóð.