Lægri rafmagnsreikningar í dreifbýli

Við höldum úti sérstakri gjaldskrá fyrir dreifbýli og annarri fyrir þéttbýli. Ástæðan er sú að kostnaður við dreifingu raforku er ólíkur eftir svæðum. Í dreifbýli er dreifikerfið víðfeðmara, lengri vegalengdir eru á milli notenda og kostnaður við uppbyggingu, rekstur og viðhald kerfisins er því almennt hærri en í þéttbýli. 
Með sérstakri gjaldskrá er hægt að meta þennan kostnaðarmun, reikna út hverju þarf að jafna og sjá hversu vel dreifbýlisframlag dregur úr muninum. Eftir breytinguna verður jöfnun á kostnaði milli dreifbýlis og þéttbýlis um 90-96%. 

Fögnum auknum jöfnuði

Við tökum þessari breytingu fagnandi en hún kemur í kjölfarið á því að stjórnvöld hækkuðu fjárhæð jöfnunargjalds í byrjun þessa árs. Jöfnunargjaldið er sameiginlegur pottur sem síðan er nýttur til að greiða framlag til raforkunotenda í dreifbýli. Hækkun dreifbýlisframlagsins er mikilvægt skref í átt að aukinni jöfnun kjara milli viðskiptavina í dreifbýli og þéttbýli og skiptir miklu máli fyrir heimili, fyrirtæki og samfélög um land allt. 
Lækkunin mun koma fram á reikningum með gjalddaga í byrjun júlí.