Breyting á gjaldskrá fjarvarmaveitu á Seyðisfirði frá 1. mars

Raforkuskortur ástæða hækkunar
Landsvirkjun tilkynnti Rarik um að skerðingar verði á afhendingu ótryggs rafmagns til kyndistöðvarinnar frá og með 18. janúar sl. Ætla má að umræddar skerðingar standi í allt að fjóra mánuði og er ástæðan raforkuskortur. Horfur í vatnsbúskap verða endurmetnar og gætu stytt skerðingatímann, en hámarkstími skerðinga er 120 dagar skv. samningum. Óháð skerðingu hefur rekstur veitunnar verið erfiður undanfarin ár. Árið 2017 tilkynntum við um lokun veitunnar. Í kjölfarið óskuðu ráðuneyti, Orkustofnun og sveitarfélagið eftir fresti til að skoða aðra valkosti. Síðan þá hafa ýmsir valkostir verið skoðaðir og viðræður staðið yfir milli okkar og sveitarfélagsins Múlaþings um að Rarik hætti rekstri veitunnar á þessu ári og sveitarfélagið taki yfir reksturinn.

Viðbótakostnaður vegna skerðingar samsvarar árstekjum veitunnar
Á meðan skerðing Landsvirkjunar varir höfum við þurft að grípa til þess að keyra fjarvarmaveituna með olíu. Áætlaður viðbótarkostnaður vegna skerðingar í 120 daga samsvarar árstekjum veitunnar. Við metum það sem svo að þrátt fyrir að mikil hækkun sé íþyngjandi sé hækkun óhjákvæmileg í ljósi aðstæðna. 

Umhverfis-, orku- og loftslagsráðuneytið ásamt Orkustofnun hefur samþykkt hækkun gjaldskrárinnar, en jafnframt ákveðið hækkun á niðurgreiðslum til viðskiptavina til að koma til móts við þessa hækkun. Niðurgreiðslurnar fara úr 5,46 kr./kWst í 6,44 kr./kWst frá og með 1. mars 2024. Jafnframt munum við halda áfram viðræðum við sveitarfélagið Múlaþing um framtíð húshitunar á Seyðisfirði, vegna áforma okkar um að hætta rekstri veitunnar á þessu ári.

Uppfært: HEF veitur tóku yfir rekstur fjarvarmaveitunnar á Seyðisfirði frá og með 1. janúar 2025.