Mikilvægt að viðskiptavinir Fallorku velji nýjan raforkusala fyrir 10. desember

Ekki bíða

Fallorka hefur tilkynnt að félagið hætti allri sölu á rafmagni til heimila og fyrirtækja frá og með 1. janúar 2026 og einbeiti sér framvegis að framleiðslu raforku. Þetta þýðir að allir viðskiptavinir Fallorku þurfa að velja sér nýjan raforkusala fyrir 10. desember. Nánar um þetta má lesa í frétt á vef Fallorku. 

Samkvæmt lögum er dreifiveitum, líkt og Rarik og Norðurorku, ekki heimilt að selja rafmagn eða koma að vali á raforkusala fyrir hönd viðskiptavina sinna. Þær mega aðeins dreifa rafmagni til viðskiptavina sem hafa valið og gert samning við raforkusala. Ef enginn söluaðili raforku er skráður er okkur ekki heimilt að afhenda rafmagn.

Það er einfalt að skipta

Við viljum hvetja þá viðskiptavini okkar sem hingað til hafa keypt rafmagn af Fallorku til að ganga frá samningi við nýjan raforkusala sem allra fyrst (og fyrir 10. desember), svo tryggt verði að ekki verði rof á þjónustu þegar Fallorka hættir sölu um komandi áramót. Skiptin sjálf eru einföld. Viðskiptavinum nægir að hafa samband við þann raforkusala sem þeir vilja kaupa raforku af, til dæmis í gegnum vef eða þjónustuver þess fyrirtækis. Nýr raforkusali sér um að tilkynna breytingarnar fyrir þeirra hönd. Nánar um val á raforkusala má lesa á vef Samorku.

Óháð því hvaða raforkusala viðskiptavinir velja mun Rarik áfram annast örugga dreifingu rafmagns á sínu dreifisvæði í samræmi við lög og reglur, og tryggja áreiðanlega afhendingu raforku til heimila og fyrirtækja svo samfélög á landsbyggðinni megi vaxa og dafna.