Starfskjarastefna

Starfskjarastefna Rarik – Samþykkt á aðalfundi 22.3.2024 

Starfskjarastefna Rarik ohf. er sett í samræmi við 79. gr. a. laga nr. 2/1995 um hlutafélög. Stefnan byggir jafnframt á leiðbeiningum Viðskiptaráðs, Nasdaq og SA um góða stjórnarhætti, með langtímahagsmuni að leiðarljósi.

Það er stefna Rarik að laða til sín og hafa á að skipa hæfu starfsfólki og stjórnendum sem styðja við hlutverk og stefnu fyrirtækisins. Til að svo megi verða er nauðsynlegt að bjóða samkeppnishæf laun við samanburðarfyrirtæki án þess þó að vera leiðandi í samanburði. Ákvörðun launa er ávallt byggð á jafnréttissjónarmiðum, virðingu fyrir starfsfólki, gildandi kjarasamningum, lögum og reglum. Vottað jafnlaunakerfi, sbr. ÍST 85, skal vera til staðar. Stjórn félagsins fer með hlutverk starfskjaranefndar.

1. Starfskjör

1.1. Starfskjör almennt

Starfskjör skulu taka mið af starfskjarastefnu og endurspegla ábyrgð og frammistöðu í starfi. Lögð er áhersla á þátttöku í kjararannsóknum, þar sem markmiðið er ávallt að launaþróun starfsfólks sé byggð á vitneskju um þróun markaðarins. Greidd skulu sambærileg laun fyrir sambærileg hlutverk óháð kyni í samræmi við jafnlaunakerfi fyrirtækisins.

1.2. Starfskjör forstjóra

Stjórn ræður forstjóra og semur um starfskjör við hann í samræmi við starfskjarastefnu. Kjör forstjóra skulu vera samkeppnishæf við samanburðarfyrirtæki og taka mið af hæfni, ábyrgð og umfangi starfsins. Tilgreina skal önnur starfskjör í ráðningarsamningi, svo sem greiðslur í lífeyrissjóð, orlof, hlunnindi, uppsagnarfrest og önnur kjör og skulu þau vera með áþekkum hætti og hjá samanburðarfyrirtækjum. Kjör forstjóra skulu vera endurskoðuð árlega. Haft skal að leiðarljósi að ekki komi til frekari greiðslna við starfslok en fram koma í ráðningarsamningi.

1.3. Starfskjör framkvæmdastjóra 

Forstjóri ræður framkvæmdastjóra sviða að höfðu samráði við stjórnarformann og ákvarðar laun þeirra í samræmi við starfskjarastefnu. Kjör framkvæmdastjóra skulu endurskoðuð árlega og vera samkeppnishæf við samanburðarfyrirtæki. Kjör framkvæmdastjóra taka mið af ábyrgð og umfangi starfsins.

1.4. Starfskjör stjórnarmanna

Stjórnarmönnum félagsins skal greidd þóknun samkvæmt ákvörðun aðalfundar félagsins ár hvert. Á aðalfundi skal jafnframt tekin ákvörðun um laun fyrir setu í undirnefndum stjórnar. Skal þóknunin taka mið af þeirri ábyrgð sem starfinu fylgir og vinnuframlagi sem þörf er á starfsins vegna, auk þess sem litið skal til þóknunar stjórnarmanna sambærilegra félaga.

2. Umbun til viðbótar grunnlaunum

Félagið greiðir ekki árangurstengdar greiðslur, veitir ekki réttindi tengd hlutum í félaginu eða gerir lánasamninga við starfsmenn eða stjórnendur. Lífeyrisgreiðslur skulu vera í samræmi við það sem tíðkast hjá sambærilegum félögum.

3. Endurmenntun

Rarik leggur áherslu á þjálfun og endurmenntun starfsfólks. Markmiðið er að þróa mannauð félagsins til að takast á við ábyrgð og verkefni í síbreytilegu starfsumhverfi. Jafnframt að skapa starfsfólki tækifæri til að þróast í starfi og takast á við ný hlutverk. Kostnaður við endurmenntun skal vera hóflegur og í samræmi við tilgang endurmenntunarinnar. Í þeim tilvikum sem kostnaður er umtalsverður skal liggja fyrir rökstuðningur yfirmanns og samþykki forstjóra.

4. Starfslok

Það er stefna félagsins að gera ekki sérstaka starfslokasamninga við stjórnendur eða starfsmenn félagsins umfram skyldur félagsins samkvæmt lögum og kjarasamningum.

5. Samþykkt, endurskoðun og upplýsingagjöf

Starfskjarastefnan er leiðbeinandi fyrir stjórn félagsins. Ef stjórn víkur frá starfskjarastefnunni skal það rökstutt í hverju tilviki fyrir sig, í fundargerð stjórnar. Starfskjarastefna þessi er á ábyrgð stjórnar og skal vera aðgengileg á heimasíðu félagsins. Stjórn skal hafa eftirlit með að starfskjarastefnu sé framfylgt og veita upplýsingar um starfskjör stjórnar og forstjóra. Stjórn skal árlega yfirfara stefnuna og gera tillögur að breytingum ef ástæða þykir. Starfskjarastefna skal samþykkt á aðalfundi, með eða án breytinga.