Áhættustefna Rarik

Rarik ohf setur sér áhættustefnu til að tryggja sem best að megin markmiðum fyrirtækisins verði náð og að settum lögum og reglum sé fylgt. Rarik skal uppfylla skilgreind hlutverk fyrirtækisins skv. samþykktum þess og taka meðvitaða ásættanlega áhættu í samræmi við stefnu fyrir mismunandi megin þætti starfseminnar. Stjórnun á áhættum fyrirtækisins er mikilvægur þáttur ákvörðunartöku.

 

Í áhættustefnu er settur fram áhættuvilji stjórnar Rarik ohf. og rammi fyrir áhættustjórnun fyrirtækisins. Í skjalinu eru og skilgreind hlutverk og ábyrgðir við áhættustjórnun.

 

Markmið

 

Markmið áhættustefnu er að:

• Skilgreina og koma á framfæri áhættuvilja stjórnar fyrir megin þætti starfseminnar.
• Stuðla að áhætta sé tekin með í ákvörðunartöku með skilgreindum ramma um stjórnun áhættu.
• Stuðla að skipulagðri greiningu og meðferð áhættu.
• Skilgreina hlutverk og ábyrgðir vegna áhættustjórnunar.
• Upplýsa stjórn og stjórnendur um helstu áhættuþætti sem áhrif hafa á markmið félagsins.
• Auka vitund um áhættur og áhættustjórnun. 

 

Áhættuvilji og áhættuþol

Áhættuvilji skilgreinir umfang og tegund áhættu sem fyrirtæki er viljugt til þess að sækjast eftir eða viðhalda. Hann skilgreinir jafnvægi áhættutöku fyrir helstu þætti reksturs og hversu mikla áhættu fyrirtækið er reiðubúið að taka til að auka jákvæð áhrif og minnka neikvæð áhrif fyrir viðkomandi þætti í rekstri fyrirtækisins. Áhættuviljinn lýsir því viðunandi eftirstæðri áhættu skv. skilgreiningu stjórnar.

 

Áhættuþol eru þau vikmörk sem sett eru við sett markmið í hverjum mælikvarða.

 

Tafla 1: Skilgreining á stigum áhættuvilja

 

Stig áhættuvilja Eftirstæð áhætta	Skýring
5. Mikil áhætta	Vilji til að taka mikla áhættu til að nýta tækifæri og jákvæð áhrif aðgerða.
4. Aukin áhætta	Vilji til að taka nokkra áhættu, ef meiri líkur en minni eru á jákvæðum áhrifum aðgerða.
3. Grunnáhætta	Áhætta óbreytt m.v. hefðbundna starfsemi. Áhættuhlutlaus rekstur og hefðbundin meðhöndlun áhættu.
2. Minnkuð áhætta	Aukin áhersla á að forðast áhættu til að minnka neikvæð áhrif aðgerða.
1. Lágmarks áhætta	Mikil áhersla á að forðast áhættu til að útiloka neikvæð áhrif aðgerða.

 

Almennt telst rekstur Rarik vera fremur áhættufælinn, þ.e. ekki eru margir þættir sem falla undir aukna eða mikla áhættu.

 

---

Áhættur

---

 

Áhættuvilji er skilgreindur fyrir helstu áhættuflokka í starfsemi Rarik.

 

Reglulega skal meta hvort að áhættur skilgreindra áhættuflokka séu innan viðmiða um eftirstæða áhættu.

 

	Áhættuvilji - Eftirstæð áhætta -
Áhættusafn	1	2	3	4	5	Skýring
Mannauður og starfsumhverfi
Mannauður			x			Áhersla á hefðbundna meðhöndlun áhættu
Öryggismál	x					Mikil áhersla á að forðast áhættu
Starfsemi og rekstur veitukerfa
Rekstrarleg áhætta			x			Áhersla á hefðbundna meðhöndlun áhættu
Vörugæði	x					Mikil áhersla á að forðast áhættu
Þjónustugæði		x
Umhverfismál		x				Aukin áhersla á að forðast áhættu
Fjármál og rekstrarumhverfi
Fjárhagsleg áhætta			x			Áhersla á hefðbundna meðhöndlun áhættu
Lagaleg áhætta			x			Áhersla á hefðbundna meðhöndlun áhættu
Upplýsingaöryggi
OT vöktunar og stýrikerfi	x					Mikil áhersla á að forðast áhættu
IT upplýsingakerfi		x				Aukin áhersla á að forðast áhættu
Stefnumótun
Stjórnarhættir	x					Mikil áhersla á að forðast áhættu
Loftslagsmál			x			Áhersla á hefðbundna meðhöndlun áhættu
Nýsköpun og þróun				x		Vilji til að taka nokkra áhættu

 

---

Mannauður og starfsumhverfi

---

 

Mannauðsmál

Markmið Rarik er að hafa ætíð á að skipa hæfu og áhugasömu starfsfólki sem býr yfir nauðsynlegri kunnáttu til að tryggja gæði þjónustunnar. Leitast er við að hæfileikar starfsfólks fái notið sín í starfi og jafnréttis sé gætt í hvívetna.

Mikilvægt er að þekking viðhaldist innan fyrirtækisins við eðlilega starfsmannaveltu og unnið er markvisst að þróun mannauðs og endurmenntun þannig að góð dreifing verði á reynslu og nýrri þekkingu starfsfólks.

 

Mælikvarði: 

Valdir starfsmannavísar – Ánægjuvog starfsmanna, jafnlaunavottun og starfsmannavelta.

 

Öryggismál

Við höfum sett okkur stefnu í öryggismálum sem miðar að því að tryggja öryggi starfsfólks, viðskiptavina og almennings. Lögð er áhersla á eflingu öryggismenningar og stöðugar umbætur í öryggismálum.

 

Mælikvarði: 

Valdir öryggisvísar – Slysagreining og alvarlegar athugasemdir í ytri úttektum.

 

---

Starfsemi og rekstur veitukerfa

---

 

Rekstrarleg áhætta

Rarik leitast við að lágmarka áhættur við rekstur og uppbyggingu dreifikerfa. Við beitum viðurkenndum aðferðum við uppbyggingu og rekstur kerfanna, fylgjumst með tíðni truflana og leggjum áherslu á fyrirbyggjandi viðhald. Afgangsáhættu er m.a. mætt með viðlagatryggingu. 

 

Mælikvarði: 

Valdir vísar um afhendingaröryggi – Fyrirvaralausar truflanir, skerðing til notenda og tilkynningaskyldar truflanir. 

 

Vörugæði

Rarik hefur það sem markmið að tryggja að gæði afhendingar á rafmagni uppfylli þær kröfur sem gerðar eru skv. lögum og reglum sem gilda hverju sinni.

 

Mælikvarði: 

Valdir vísar um gæði vörunnar - Fjöldi og afgreiðsluhraði kvartana um gæði rafmagns og varmaorku.

 

Þjónustugæði

Rarik hefur það að markmiði að tryggja gæði þeirrar þjónustu sem fyrirtækið veitir og markvisst er unnið að umbótum hennar að teknu tilliti til þarfa viðskiptavinarins og væntinga þjóðfélagsins.

 

Mælikvarði: 

Valdir þjónustuvísar – CSAT mælingar og NPS mæling. 

 

Umhverfismál

Verndun umhverfisins skal ávallt höfð í fyrirrúmi við hönnun og mat á framkvæmdum og þjónustu á vegum fyrirtækisins. Hönnun og framkvæmd skulu miða að því að valda sem minnstri röskun á umhverfinu og lífríki þess.  

 

Mælikvarði: 

Valdir umhverfisvísar – Ábendingar, umhverfistjón og mengunaróhöpp. 

 

---

Fjármál og rekstrarumhverfi

---

 

Fjárhagsleg áhætta

Markmið Rarik er að tryggja aðgengi að fjármagni og lausafé til að mæta skuldbindingum. Lausafjárstýring og gjaldskrá eru með það að markmiði að viðhalda sterkri fjárhagstöðu og viðunandi arðsemi. Fjárhagsleg áhætta getur falist í breytilegum vaxtakjörum, sveiflum í aðgengi að lánsfé og annarri markaðsóvissu.

 

Mælikvarði: 

Fjárhagslegir mælikvarðar – Eiginfjárhlutfall, vaxtaþekja og EBITDA samstæðunnar. 

 

Lagaleg áhætta

Við vöktum lagaumhverfið sem fyrirtækið starfar innan.

 

Mælikvarði: 

Hlíting laga – Dómstólar og úrskurðarnefndir raforkumála og útboðsmála.

 

---

Upplýsingaöryggi

---

 

IT – Upplýsingaöryggi

Við höfum tekið í notkun stjórnkerfi upplýsingaöryggis, sem byggt er á ISO 27001 staðlinum. Helstu markmið kerfisins eru að tryggja örugga afhendingu á orku til viðskiptavina og tryggja eftir því sem mögulegt er að upplýsingar séu réttar, tiltækar og að trúnaðar sé gætt. 

 

Mælikvarði: 

Valdir upplýsingaöryggisvísar – Tiltækileiki NIS mikilvægra kerfa, upplýsingaleki og árásarvarnir, tilkynningar til Persónuverndar.

 

OT – Vöktunar og stýrikerfi

Fjargæslukerfið er grundvöllur OT-kerfa okkar og virkni stjórnstöðvar. Kerfið veitir rauntíma vöktun á lykileiningum í dreifikerfum rafveitu og hitaveitu og styttir viðbragðstíma með möguleika á fjarstýringum. 

 

Mælikvarði: 

Ófyrirséður niðurtími kerfis. 

 

---

Stefnumótun

---

 

Stjórnarhættir

Rarik leggur ríka áherslu á siðferði og góða viðskiptahætti. 

 

Mælikvarði: 

Fjöldi rökstuddra mála þar sem grunur leikur á spillingu og/eða misferli. Tímanleg svörun formlegra ytri kvartana um starfshætti fyrirtækisins. Hlutfall fræðslu í vinnutíma starfsfólks. 

 

Loftslagsmál

Við höfum unnið eftir aðgerðaáætlun í loftslagsmálum frá árinu 2020 og sett okkur áfangaskipt markmið um að árið 2030 höfum við helmingað losun okkar frá árinu 2019. 

 

Mælikvarði: 

Valdir frammistöðumælikvarðar um losun kolefnis.

 

Nýsköpun og þróun

Rarik vill mæta nýjum tímum með árvekni þannig að viðskiptavinir hljóti hverju sinni þá þjónustu sem þeim er mestur akkur í með framsæknum en öruggum lausnum um leið og stuðlað er að eflingu atvinnulífs, nýsköpun og aukinni nýtingu innlendra orkugjafa á veitusvæði fyrirtækisins.

 

Mælikvarði: 

Eignfæranlegur þróunarkostnaður, nýsköpunarverkefni samþykkt af opinberum sjóðum, samstarf við sprotafyrirtæki.

 

---

Ábyrgðir og hlutverk

---

 

Helstu ábyrgðir og hlutverk vegna stefnu og framkvæmd áhættustjórnunar eru eftirfarandi:

 

Stjórn

• Stjórn Rarik ohf samþykkir áhættustefnu og ber megin ábyrgð á að áhættum sé stjórnað innan Rarik. 
• Stjórnin ákvarðar áhættuvilja Rarik fyrir helstu áhættuþætti félagsins.  
• Stjórn skal tryggja að nægjanlegum fjármunum og tíma sé varið í virka áhættustýringu og áhættumat þannig að innan fyrirtækisins sé yfirsýn yfir helstu áhættuþætti.
• Stjórnin framselur framkvæmd áhættustjórnunar til forstjóra í samræmi við skilgreinda ferla / áhættustjórnkerfi félagsins. 

Forstjóri

• Stjórn felur forstjóra daglega stjórnun áhættu hjá fyrirtækinu. Forstjóri ber ábyrgð á að greina, mæla og hafa eftirlit með áhættum sem starfseminni fylgja. 
• Forstjóri framselur framkvæmd áhættustjórnunar til stjórnenda í samræmi við skilgreiningar í handbók fyrirtækisins. 
• Forstjóri gerir árlega tillögu til stjórnar um endurskoðun áhættustefnu Rarik.

Endurskoðunarnefnd

• Rýnir árlega áhættustefnu Rarik og gerir tillögur til stjórnar.

 

---

Upplýsingagjöf

---

 

Stjórn fær tvisvar á ári skýrslu um stöðu áhættumála þar sem m.a. kemur fram: 

• Helstu áhættur í starfsemi Rarik.
• Staðan miðað við mælikvarða áhættuvilja og breytingar frá síðasta mati.
• Umfjöllun um framtíðarhorfur varðandi áhættur, áhættumat, sem tekur mið af heildarumhverfi fyrirtækisins.
  
  

---

Gögn

---

 

Áhættustefna Rarik ohf. skal vera aðgengileg á vef fyrirtækisins. Áhættustefnuna skal kynna fyrir starfsfólki og helstu hagsmunaaðilum. Áhættustefnuna skal endurskoða á hverju ári, og oftar ef aðstæður krefjast. Áhættuvilji Rarik ohf. kemur fram í skilgreindri áhættustefnu.

 

Handbók

Handbók fyrirtækisins lýsir framkvæmd áhættustjórnunar hjá Rarik ohf.