Til að draga úr líkum á tjóni frá rafmagni

Við sendum út tilkynningar um rafmagnsleysi með SMS skilaboðum og í tölvupósti til viðskiptavina sem hafa símanúmer og netfang skráð hjá okkur. Ef mögulegt er þá eru slíkar tilkynningar sendar viðskiptavinum þegar fyrirvaralaust rafmagnsleysi verður eða þegar búist er við rafmagnsleysi vegna vinnu við raforkukerfið. Til að fá slíkar tilkynningar þarf að skrá réttar upplýsingar um símanúmer og netfang á Mínar síður, eða hafa samband við okkur í síma 528 9000 og gefa upp símanúmer/netfang.

Mikilvægt er að bregðast við slíkum tilkynningum og grípa til viðeigandi ráðstafana, svo sem að taka viðkvæm tæki úr sambandi og huga að því hvort rafmagn hafi komist aftur á húsið að truflun lokinni.

Til að verja raftæki fyrir truflunum frá rafmagni er einfalt og öruggt ráð að taka þau úr sambandi þegar þau eru ekki í notkun. Ef tilkynnt hefur verið um rafmagnsleysi, veðurútlit er slæmt eða von er á þrumuveðri er skynsamlegt að taka viðkvæm tæki úr sambandi, svo sem sjónvörp, tölvur, heita potta og rafeindastýrðan búnað.

Rafmagnsvöktunarbúnaður eða spennuleysisvari er einfalt tæki sem setja má í samband við venjulegan heimilistengil og sendir húseiganda boð ef rafmagn fer af eða kemur á. Þessi búnaður er gagnlegur ef mannlaust hús verður rafmagnslaust og gerir forráðamönnum þess mögulegt að bregðast við í tæka tíð. Venjuleg öryggiskerfi gefa einnig slíkar upplýsingar. Hægt er að fá rafmagnsvöktunarbúnað hjá söluaðilum á Íslandi eða erlendis frá (e. Power Failure Detector).

Við truflanir í raforkukerfinu getur spenna hækkað talsvert í skamman tíma, eða í fáein sekúndubrot. Rétt hönnuð raftæki eiga að þola slík frávik en reynslan sýnir að alltof algengt er að þau geri það ekki. Sérstaklega er rafeindabúnaður viðkvæmur fyrir slíkum atvikum. Til að verja öll raftæki má setja upp yfirspennuvörn í aðaltöflu neysluveitu, en það er einfaldur og tiltölulega ódýr búnaður. Athugið að löggiltur rafverktaki þarf að annast uppsetningu slíks búnaðar eins og á við um allar breytingar á aðaltöflu.

Almennt þola raftæki betur að spenna lækki í skamman tíma, (í fáein sekúndubrot), heldur en spennuhækkun. Reynslan sýnir að sum tæki þola slíka spennulækkun samt ekki, t.d. viðkvæmur rafeindabúnaður. Til að verja raftæki í slíkum atvikum er hægt að setja undirspennuvörn í aðaltöflu neysluveitu, en það er einfaldur búnaður á hóflegu verði sem unnt er að fá löggiltan rafverktaka til að annast uppsetningu á. Hafðu hugfast að aðeins löggiltum rafverktökum er heimilt að gera breytingar á aðaltöflu.

Þegar t.d. spáð er óveðri eða eldingaveðri og búast má við rafmagnstruflunum er ráðlegt að slökkva á þeim raf­magns­tækj­um, sem slökkva ekki á sér sjálf þegar rafmagni slær út, sér í lagi þeim sem geta valdið tjóni þegar rafmagn kem­ur á að nýju. Þetta á meðal annars við um elda­vél­ar og fleiri hit­un­ar­tæki en einnig er ráðlegt að slökkva á og taka úr sambandi viðkvæm­u tæki á borð við sjón­vörp. Þá hefur reynst mörgum vel að að eiga vasaljós að grípa til því farsímaljós eru fljót að tæma farsímarafhlöður enda símarnir orkufrekir. Við minnum einnig á að rafmagnsleysi getur haft áhrif á fjarskipti og ýmsa þjónustu sem er háð rafmagni.