Landsbyggðarfyrirtækið RARIK

RARIK er fyrst og fremst þekkingar- og þjónustufyrirtæki sem sér um dreifikerfi raforku á landsbyggðinni. Þá er fyrirtækið lykilaðili í innleiðingu þriðju orkuskiptanna á Íslandi, í samgöngum. Sú staðreynd að RARIK þjónar mjög stórum hluta landsbyggðarinnar, dreifikerfi þess er þar og 70% starfa RARIK eru einnig á landsbyggðinni, gerir RARIK sjálfkrafa að landsbyggðarfyrirtæki.

Viðskiptavinir á höfuðborgarsvæðinu 
Það að höfuðstöðvar fyrirtækisins séu á höfuðborgarsvæðinu á sér einnig eðlilegar skýringar. Fyrir það fyrsta er oft litið fram hjá þeirri staðreynd að stærsti einstaki hópur viðskiptavina RARIK er þegar á höfuðborgarsvæðinu þótt afhending orkunnar fari fram utan höfuðborgarsvæðisins. Þá eru margir hagaðilar RARIK, svo sem stjórnsýsla, eftirlitsaðilar, verkfræðistofur og aðrir samstarfsaðilar einnig með aðsetur á höfuðborgarsvæðinu. Mikil þekking og reynsla myndi tapast ef starfsemi RARIK í Reykjavík yrði flutt annað þar sem erfiðara yrði um vik að rækta þessi hagaðilatengsl auk þess sem hætta yrði á atgervisflótta og fyrirtækið myndi missa mikilvæga þekkingu og hæfni.

RARIK hefur gert grein fyrir þessari afstöðu sinni, meðal annars í umsögn við nýlega þingsályktunartillögu sem lesa má hér og einnig í svari sínu til sveitastjórnar Skeiða- og Gnúpverjahrepps sem lesa má hér. Þar er einnig minnst á þá staðreynd að flutningur höfuðstöðva RARIK á landsbyggðina myndi hafa í för með sér sérstakt óhagræði og ójöfnuð fyrir önnur svæði landsbyggðarinnar þar sem RARIK rekur starfsstöðvar. Enn eru samgöngur til Reykjavíkur fjölbreyttari og auðveldari frá öllum landshlutum en á milli landshluta.

Það er mat RARIK að starfsemi fyrirtækisins sé í eðlilegu jafnvægi með núverandi fyrirkomulagi. Ekki er óeðlilegt að einhver hluti fyrirtækis, sem er í eigu allra landsmanna, sé á höfuðborgarsvæðinu, allra síst í ljósi þess að þar er stærsti hluti viðskiptavinanna og stórir hagaðilar, eins og áður er nefnt. Þá hefur stjórn RARIK markað sér þá stefnu að horft sé sérstaklega til þess að auglýsa störf óháð staðsetningu. Stjórn hefur einnig samþykkt það verklag að störf sem losna í Reykjavík eru auglýst án staðsetningar, á meðan störf sem losna á landsbyggðinni eru auglýst með staðsetningu á landsbyggðinni. Eins og áður segir eru rúm 140 af 200 starfsmönnum RARIK á landsbyggðinni og sem dæmi hafa um 40 starfsmenn aðsetur á Suðurlandi, í starfsstöðvum á Selfossi og Hvolsvelli. Þá er fjöldi sérfræðinga og stjórnenda staðsettur í starfsstöðvum RARIK á landsbyggðinni.

Sem þjónustufyrirtæki leggur RARIK áherslu á að hafa starfsfólk og starfsstöðvar nálægt verkefnum og viðskiptavinum. Þegar er unnið að því að skapa tækifæri á áhugaverðum störfum óháð kyni á öllu landinu en það er í takt við þróun nútíma samfélags. Þar spilar RARIK lykilhlutverk en dreifikerfi RARIK er forsenda búsetu út um allt land og þeirra orkuskipta sem við stöndum frammi fyrir.