Varaaflstöðvar munu sjá Norðausturhorninu fyrir rafmagni á meðan unnið verður við línuna, en búast má við einhverjum truflunum.
Á næstu vikum verða óvenju margar aðgerðir á Kópaskerslínu Landsnets sem sér um afhendingu rafmagns frá landskerfinu inn á norðausturhornið frá Kelduhverfi að Bakkafirði.
Dagana 15. til 17. ágúst fer fram fullnaðarviðgerð á línunni eftir eldingaveður þann 30. júní. Alls skemmdust 14 stæður í línunni en gert var við þá stæðu sem mest skemmdist aðfaranótt 7. júlí. Ekki er talið óhætt að bíða með viðgerðir fram í september enda getur þá verið allra veðra von eins og íbúar á norðausturhorninu þekkja mæta vel.
Í byrjun september þarf að fara í aðgerðir til að undirbúa línuna fyrir varanlega tengingu hennar við kerfið á Þeistarreykjum. Eftir að þeim aðgerðum líkur verður línan tengd við byggðarlínuhringinn frá Kröfluvirkjun, auk eldri tengingar við Akureyri í gegnum Laxárvirkjun. Mun það auka afhendingaröryggi á norðausturhorninu verulega, enda er línan á milli Akureyrar og Laxárvirkjunar komin vel til ára sinna.
Að lokum þarf að taka rafmagn af Kópaskerslínu þegar línurnar á milli Þeistarreykja og Bakka verða strengdar yfir Kópaskerslínu. Er sú aðgerð áætluð um miðjan september. Reynt verður að sameina þá vinnu við tengingu Kópaskerslínu við Þeistarreyki ef möglegt er.
Á meðan þessum aðgerðum stendur mun RARIK keyra varaaflstöðvar á Raufarhöfn, Þórshöfn og Bakkafirði, auk þess sem færanlegar stöðvar verða staðsettar í Lindarbrekku og á Kópaskeri. Varaafl verður einnig aukið á Raufarhöfn og Þórshöfn og verða því samtals fjórar færanlegar vélar staðsettar á svæðinu. Því má búast við hvin frá rafstöðvunum og færanlegu varaaflsvélunum þessa daga, auk þess sem rafmagn kann að verða óstöðugra.
Á meðan unnið er í þessum aðgerðum þarf að taka rafmagn af í örstuttan tíma í lok dags í Kelduhverfi, Öxarfirði, Kópaskeri, Sléttu og mögulega hluta Kópaskers á meðan fært verður frá varaafli yfir á netið. Tilkynningar verða sendar til notenda þar sem það á við.
Landsnet og RARIK vona að íbúar á svæðinu sýni þeim óþægindum sem af þessum aðgerðum leiða skilning.
Sími: 528 9000
Opið:
Mán-fim 9-16 og fös 9-15