Ljósahátíðin List í ljósi á Seyðisfirði fór fram í sjöunda sinn um nýliðna helgi, dagana 11. og 12. febrúar. Að þessu sinni tóku um 30 listamenn þátt í að lýsa upp vetrarmyrkrið með 27 ljósalistaverkum og þar á meðal nokkrir erlendir listamenn sem áttu erfitt með þátttöku á síðasta ári vegna COVID-19 takmarkana. Sem fyrr var RARIK einn af bakhjörlum hátíðarinnar og lagði að auki sitt af mörkum til að lýsa upp náttmyrkrið og stytta hátíðagestum stundir.
Í tilefni af 75 ára afmæli fyrirtækisins í ár var útbúið stutt vídeóverk sem varpað var á spennistöðvarhús RARIK í bænum. Verkið nefnist Úr lofti í jörð og var unnið af Sahara fyrir RARIK. Það veitir áhorfendum innsýn í strengvæðingu dreifikerfis RARIK sem hefur verið eitt allra stærsta verkefni fyrirtækisins síðustu þrjátíu ár. Nú hafa 72% dreifikerfisins verið færð úr loftlínum í jarðstrengi sem hefur aukið rektraröryggi kerfisins til muna um leið og það hefur dregið úr óæskilegum sjónrænum áhrifum.
Sími: 528 9000
Opið:
Mán-fim 9-16 og fös 9-15