Stjórn RARIK heimsækir a.m.k. einn landshluta á dreifiveitusvæði RARIK árlega til að ræða við sveitarstjórnir og heimsækja starfsstöðvar fyrirtækisins. Þetta er mikilvægur þáttur í að kynna starfsemi RARIK gagnvart sveitarfélögunum, heyra hvað á þeim brennur, svara spurningum og koma á góðum skoðanaskiptum um stöðu dreifikerfisins. Að þessu sinni var Norðurland sótt heim dagana 24. og 26. ágúst 2022.
Fyrsta dag stjórnarferðar var starfsstöð RARIK á Akureyri heimsótt og rætt við starfsfólk. Á hádegi var fundað á Hótel KEA með sveitarstjórnum Eyjafjarðarsveitar, Grýtubakkahrepps, Svalbarðsstrandarhrepps, Akureyrarbæjar og Hörgársveitar. Þar voru rædd ýmis mál m.a. ástæður verðmunar raforkudreifingar í dreifbýli og þéttbýli, rætt um endurnýjun dreifikerfisins, þrífösun í sveitum og fjallað um lagningu jarðstrengja með ljósleiðurum. Því næst var haldið til Húsavíkur og fundað með sveitarstjórnum í Þingeyjasýslum. Þar var rætt m.a. um stöðu þrífösunar í sveitum og afhendingaröryggi raforku. Að lokum var haldið á jarðhitasvæðið við Þeistareyki og farið í skoðunarferð um jarðvarmavirkjun Landsvirkjunar.
Á stjórnarfundi sem haldinn var á öðrum degi var m.a. afgreiddur árshlutareikningur RARIK, en að því loknu var haldið til Dalvíkur og fundað með sveitarstjórnum Fjallabyggðar og Dalvíkurbyggðar. Þar var m.a. rætt um mögulegar tengingar smávirkjana á svæðinu og flutningsgetu til að takast á við frekari uppbyggingu. Að fundi loknum fór stjórn í skoðunarferð í hátæknifiskvinnslu Samherja á Dalvík. Að lokum var haldið til Siglufjarðar þar sem starfsstöð RARIK var heimsótt og rætt við starfsfólk.
Á þriðja degi var haldið til Sauðárkróks, farið í skoðunarferð um aðveitustöð RARIK og starfsstöð fyrirtækisins heimsótt og rætt við starfsfólk. Á hádegi var fundað með sveitarstjórnum sameinaðs sveitarfélags Skagafjarðar og Akrahrepps. Þar var rætt m.a. um raforkuverð, skilgreiningar á þéttbýli í verðskrám raforkudreifingar og tengigjalda, verðjöfnun á milli dreifikostnaðar í þéttbýli og dreifbýli og dreifingu starfa um landsbyggðina.. Að loknum fundi var farið í skoðunarferð í Mjólkursamlag KS. Því næst var haldið á Blönduós og fundað með sveitarstjórnum Skagabyggðar, Skagastrandar, Húnabyggðar. Á fundinum var m.a. rætt um stöðu hitaveitunnar á svæðinu og þær áskoranir sem framundan eru.
Að venju var heimsókn stjórnar RARIK vel tekið af sveitarstjórnum, starfsmönnum og öðrum sem við hana ræddu og að mati fyrirtækisins er þessir fundir mikilvægir og stefnt að því að halda þessari hefð áfram.
Sími: 528 9000
Opið:
Mán-fim 9-16 og fös 9-15