Ert þú tilbúin fyrir Framadaga var spurning sem lögð var fyrir námsmenn í framhaldsskólum í aðdraganda þessa árvissa viðburðar sem haldinn var í Háskólanum í Reykjavík í dag, föstudaginn 11. mars. Það stóð ekki á svarinu, því námsmenn fjölmenntu að vanda í „stærsta atvinnuviðtal ársins“ eins og Framadagar hafa stundum verið nefndir. Nemendur voru hvattir til að mæta með nokkur eintök af ferilskránni með sér því „þú veist aldrei hvað gæti gerst“ eins og sagði í skilaboðum til nemenda á samfélagssíðu viðburðarins.
Framadagar eru skipulagðir af alþjóðlegu stúdentasamtökunum AIESEC og þar var RARIK eins og undanfarin ár með upplýsingabás ásamt hópi valinna fyrirtækja sem kynntu starfsemi sína fyrir yngri kynslóð atvinnumarkaðarins. Þessi viðburður hefur skapað sér fastan sess í háskólalífinu og verið mjög vinsæll meðal nemenda auk þess sem hann hefur reynst góð leið fyrir fulltrúa fyrirtækjanna til að hitta tilvonandi framtíðarstarfsmenn. Starfsmenn RARIK höfðu nóg að gera við að svara spurningum áhugasamra nemenda sem vildu kynna sér ýmsar hliðar starfseminnar og möguleika á sumar- og framtíðarstörfum eða jafnvel hugsanlegu samstarfi um verkefnavinnu. Um leið og fulltrúar RARIK lögðu sig fram um að svara eins greiðlega og hægt var spurningum nemenda voru þeir hvattir til að kynna sér vef fyrirtækisins.
Sími: 528 9000
Opið:
Mán-fim 9-16 og fös 9-15