Óvenjumikið framkvæmdaár

Meðal helstu þátta fjárfestinganna í ár má nefna að til Stofnkerfis (Grunnkerfis) RARIK er áætlað að verja 1,3 milljarði króna, en stærstu einstöku verkin þar eru ný aðveitustöð á Sauðárkróki, stækkun aðveitustöðvar á Rangárvöllum við Akureyri, ný aðveitustöð á byggðalínu við Hnappavelli í Öræfum og á árinu er fyrirhugað að ljúka 33 kV jarðstrenglögn til Víkur í Mýrdal, sem eykur afhendingaröryggi þar til muna.

Í dreifbýli er gert ráð fyrir 2,3 milljarða króna fjárfestingu í endurnýjun og aukningu dreifikerfis í sveitum. Stærsti hlutinn, 2 milljarðar króna, fara til jarðstrengvæðingar og þrífösunar, auk notendadrifinnar aukningar. Hér er um að ræða óvenju háa upphæð sé tekið mið af langtímaáætlun RARIK, en það stafar af ákvörðun stjórnar RARIK um að í kjölfar óveðurs í desember síðastliðnum verji RARIK aukalega 230 milljónir króna í strengvæðingu á Norðurlandi, þátttaka í verkefninu brothættar byggðir, en í ár er ætlunin að vinna fyrir 220 milljónir króna í Landbroti og Meðallandi og loks 150 milljónir króna í verkefni tengd atvinnusköpun. Í tveimur síðast töldu verkefnunum greiðir Ríkisjóður flýtikostnað af verkunum. Í ár er því áætlað að verja ríflega 1.600 milljónum króna í jarðstrengkerfi í dreifbýli, sem er um 600 milljónum krónum meira en langtímaáætlun gerði ráð fyrir. Búið er að opna tilboð í stærstan hluta ofangreindra framkvæmda og efni að mestu komið til landsins.

Í þéttbýli er áætluð fjárfesting á árinu til endurnýjunar og til að mæta aukningu 550 milljóna króna.

Alls er áætlað að fjárfesta í nýframkvæmdum tengdum hitaveitu fyrir 1,2 milljarða króna. Stærstur hluti þeirrar upphæðar fer í framkvæmdir við hitaveituna til Hornafjarðar, en einnig verður nokkuð um framkvæmdir við hitaveitusvæði sem þjónar Blönduós og Skagaströnd.

Á árinu er einnig stefnt að útskiptum á orkumælum fyrir ríflega 400 milljónir króna, en þar er um að ræða útskipti á eldri mælum með fjarálesnum snjallmælum.

Til viðbótar því sem talið hefur verið upp hér að ofan má nefna að fjárfest verður í húsnæði fyrir rúmlega 400 milljónir króna, en stærsta einstaka verkefnið þar er bygging sem hýsa á skrifstofur RARIK á Selfossi og aðstöðu fyrir vinnuflokkinn þar, en þar hefur RARIK verið með starfsemi á þremur stöðum.