Helga Jóhannsdóttir hefur tekið við starfi framkvæmdastjóra rekstrarsviðs RARIK

Helga er ekki alveg ókunn RARIK auk þess að hafa víðtæka þekkingu á öflun og flutningi raforku, bæði hér á landi og í Noregi. Hún var við störf hjá RARIK í um fjögur ár eftir að námi lauk við skráningar í Netbas gagnagrunnskerfið, skráningu truflana, eldingavarnir og álagsreikninga. Hún hefur einnig starfað hjá Landsvirkjun m.a. við kerfis- og truflanagreiningu.

Frá árinu 2004 hefur Helga unnið hjá BKK Nett AS í Bergen einu af stærstu raforkufyrirtækjum Noregs. Þar sinnti Helga ýmsum ábyrgðarstörfum en hún tók fljótlega við rekstri stjórnstöðvar fyrirtækisins og vann einnig sem staðgengill framkvæmdastjóra netreksturs þess. Hún hefur margra ára reynslu af setu í neyðarstjórn BKK Nett As og sat um tíma í framkvæmdastjórn fyrirtækisins. Helga tók auk þess virkan þátt í stefnumótun, endurskipulagningu og innleiðingu nýrra stjórnunarhátta hjá fyrirtækinu.