Mikið óveður gekk yfir landið 14.febrúar síðastliðinn og voru afleiðingar þess töluverðar, sérstaklega á Suðurlandi og Suðausturlandi. Veðrið olli umtalsverðu tjóni á línukerfum RARIK og einnig voru truflanir í kerfi Landsnets sem höfðu áhrif á viðskiptavini RARIK. Um 5.600 heimili og vinnustaðir urðu rafmagnslaus og heildarkostnaður RARIK vegna óveðursins er ríflega 80 mkr.
Kerfi RARIK er eitthvað laskað eftir þennan hvell, sérstaklega á Suðurlandi. Starfsmenn okkar hafa skoðað og munu halda áfram að skoða þau svæði sem urðu verst úti til að finna veikleika í kerfinu. Það má því búast við einhverju rafmagnsleysi vegna þessa á næstunni, bæði fyrirvaralausum truflunum, en einnig þegar rafmagn verður tekið af vegna viðgerða.
Víðtækasta rafmagnsleysið varð á Suðurlandi, en einnig á Vesturlandi, Norðurlandi vestra og eystra og á Austurlandi. Mynd hér að neðan sýnir þær truflanir og bilanir sem urðu í kerfi RARIK þennan dag. Alls er vitað um 108 brotna staura í kerfi RARIK, en einnig brotnaði mikill fjöldi sláa auk línuslits, brotinna einangrara, slitinna bindinga og slíkra hluta.
Veðrið sem gekk yfir landið var mjög slæmt og náði yfir stórt svæði. Veðurspáin gekk vel eftir og var RARIK búið að undirbúa sig eins og hægt var í samræmi við hana. Farið var yfir efni, verkfæri, búnað, bíla, rætt við verktaka, o.s.frv. Hugað var að staðsetningu færanlegra varaaflsvéla fyrirtækisins og þær staðsettar þar sem talið var að þeirra yrði mest þörf. Varaaflsstöðvar voru mannaðar og mannskap dreift í ljósi veðurspár og að fengnum ráðleggingum veðurfræðinga.
Þann 13.febrúar var Neyðarstjórn RARIK virkjuð og óvissustigi lýst yfir. Ljóst var að öll svæði RARIK þurftu að vera í viðbragðsstöðu. Um leið og lá fyrir hvar voru bilanir í kerfinu var byrjað að flytja fólk á milli svæða til að flýta viðgerðum eins og frekast var hægt.
Óveðrið 14. febrúar var mjög ólíkt því sem gekk yfir í desember. Það stóð yfir í mun skemmri tíma og hægt var að hefja bilanaleit og viðgerðir mun fyrr. Þó að fleiri óveður hafi gengið yfir í kjölfarið náðist að halda áfram viðgerðum og er þeim nú að mestu lokið. Fjölmargir starfsmenn RARIK stóðu vaktina í marga sólarhringa og einnig naut RARIK aðstoðar ýmissa verktaka og fyrirtækja. Öllu þessu fólki þökkum við aðstoðina og viðskiptavinum okkar sem urðu fyrir rafmagnleysi í kjölfar óveðursins þökkum við þolinmæði og skilning við þessar erfiðu aðstæður.
Sími: 528 9000
Opið:
Mán-fim 9-16 og fös 9-15