Fleiri truflanir og meiri orkuskerðing

Truflunum fjölgaði um 54 á milli ára, en fjöldinn er mjög áþekkur og í meðalári, eða 1% fleiri en meðaltal áranna 2011–2020. Þessi aukning er hins vegar þvert á þróun undanfarinna ára því dregið hefur jafnt og þétt úr truflunum vegna veðurs síðustu ár eftir því sem stærri hluti dreifikerfisins hefur verið fluttur úr loftlínum í jarðstrengi. Í kjölfar áhlaupsins í upphafi árs 2020 var sett aukið fjármagn í endurnýjun dreifikerfisins og voru samtals lagðir um 380 km af jarðstrengjum sem er mun meira en í jafnaði undanfarin ár.

Meiri skerðing til notenda

Alls urðu 596 fyrirvaralausar eða fyrirvaralitlar truflanir í dreifikerfi RARIK árið 2020, þar af voru 51% í háspennukerfinu en 49% í lágspennukerfinu. Truflunum vegna náttúruafla fjölgaði nokkuð en truflunum vegna áverka og af tæknilegum ástæðum fækkaði. Alls urðu 28% truflana vegna náttúruafla, aðallega vinds og ísingar. Um 29% truflana urðu vegna áverka, aðallega vegna graftar og áflugs fugla, en 23% fyrirvaralausra truflana voru af tæknilegum ástæðum. Orsakir 15% truflana eru óþekktar.

Skerðing á orkuafhendingu til notenda vegna fyrirvaralausra truflana var 329 MWst á árinu sem er 48% meira en í meðalári en talsvert minna en árið á undan. Veður, aðallega ísing, vindur og selta á loftlínum var orsök 63% skerðinganna, en um 11% var vegna áverka, aðallega graftar í háspennta jarðstrengi. Tæknilegar bilanir voru orsök 16% skerðinga ársins, en orsakir 8% skerðinganna eru óþekktar.