Endurnýjun dreifikerfis í dreifbýli 2023

Samkvæmt framkvæmdaáætlun RARIK er gert ráð fyrir rúmlega 3,4 milljarða fjárfestingu í endurnýjun og aukningu dreifikerfis til sveita, og þar af verður um 3,03 milljörðum  varið til þrífösunar dreifikerfisins, m.a. með aðkomu ríkisjóðs, og um 240 milljónum króna verður varið í lagningu stofnkerfis á tímabilinu.

Í ár hafa jarðstrengsverkefni fyrirtækisins tafist töluvert af ýmsum ástæðum.  Aðferðafræðin við val á jarðvinnuverktökum í þessi verk var kærð til kærunefndar útboðsmála.  Staðan í því máli er sú að RARIK má setja í gang 14 af 16 útboðsverkum sem eru á dagskrá. Tvö útboðsverk á Suðurlandi eru stopp eins og er og beðið er eftir hvort að kærunefnd útboðsmála leyfi að þau verði sett í framkvæmd eða hvort það þurfi að bjóða þau út aftur síðar.

Á forsíðu vefsins www.rarik.is er hægt að finna kortasjá og þar má nálgast samræmdar upplýsingar um helstu framkvæmdir á vegum fyrirtækisins um allt land.

Ef smellt er á framkvæmdaflipa kortasjárinnar, birtast framkvæmdir á korti sem hægt er að smella á til að fá nánari lýsingu á einstaka verki auk upplýsinga um verktíma, lengd, legu, spennu jarðstrengs o.s.frv.