Aðfaranótt 1. júní var elsta loftlína í kerfi RARIK tekin úr rekstri. Línan sem reist var árið 1939 var í eigu Laxárvirkjunnar og tengdi Akureyri upphaflega við virkjunina. RARIK tók línuna yfir á sjötta áratug síðustu aldar og hefur hún þjónað notendum í Vaðlaheiði og í Fnjóskadal síðustu áratugina.
Það gildir það sama um línukerfið og mannfólkið að það eldist misvel og verður að segjast að þessi lína stóð sig lengst af afskaplega vel. Á síðustu árum hafa hins vegar komið fram erfiðar truflanir á henni, þar með talið bilun í desember síðastliðnum sem olli fjölda útleysinga á einum sólarhring án þess að tækist að finna orsök bilunarinnar.
Nú hverfa loftlínur RARIK ein af annarri og í staðinn koma jarðstrengir sem auka rekstraröryggi dreifikerfisins og draga úr sjónrænum áhrifum. Stefnt er að því að allt dreifikerfi RARIK verði komið í jörð árið 2035.
Sími: 528 9000
Opið:
Mán-fim 9-16 og fös 9-15