Breyting á verðskrá fyrir dreifingu raforku

01.11.2023

Þann 1. nóvember mun gjaldskrá okkar fyrir dreifingu og flutning raforku hækka um 9,8%. Hækkunin, sem að þessu sinni er aðeins umfram verðlagshækkun frá síðustu hækkun kemur til af ört vaxandi framkvæmdum í dreifikerfi okkar og verulegra framkvæmda framundan, m.a. til að takast á við orkuskipti í samgöngum.

Við höfum ekki nýtt tekjuheimildir okkar að fullu á liðnum árum, heldur haldið gjaldskránni lægri en heimilt hefur verið. Nú munum við þurfa að nýta heimildir okkar betur til að geta tekist á við þarfir viðskiptavina um styrkingu núverandi kerfis og aukið afhendingaröryggi, m.a. vegna vaxandi orkuskipta. Af þeim sökum þurfum við að bregðast við og hækka gjaldskrána.

Til að ná fullum orkuskiptum þarf að fara í verulegar fjárfestingar í dreifikerfinu, m.a. í dreifbýli og teljum við að ekki sé hægt að láta gjaldskrá raforkudreifingar eina standa undir þeim fjárfestingum. Það myndi kalla á verulegar hækkanir á gjaldskrám. Skoða þarf breytingar á lagaumgjörðinni, t.d. gagnvart verðjöfnun á kostnaði við raforkudreifingu, eða með beinni aðkomu stjórnvalda að nýjum verkefnum vegna orkuskipta.

Þrátt fyrir þessa hækkun vantar mikið upp á að Rarik nýti heimildir sínar til gjaldskrárhækkana að fullu. Vaxandi fjárfestingaþörf í dreifikerfinu mun hins vegar kalla á að við nýtum þær heimildir betur á komandi misserum.