Auknar fjárfestingar á árinu 2019

Til 33 kV strenglagna verður varið 613* mkr. og þar eru stærstu verkefnin lagning strengs frá Rangárvöllum að Hólsvirkjun, strengs frá Brúarvirkjun að Reykholti í Biskupstungum og lagning strengs frá Stöðvarfirði til Breiðdalsvíkur sem ekki tókst að leggja í ár af ýmsum ástæðum. Til framkvæmda í aðveitustöðvum á að verja 1.724 mkr. og þar eru stærstu verkefnin endurnýjun aðveitustöðva. Byggðar verða nýjar aðveitustöðvar í stað eldri stöðva á Lambafelli ofan við Ólafsvík, á Sauðárkróki og á Breiðdalsvík. Auk þess verður byggð ný aðveitustöð á Hnappavöllum í Öræfum, en jarðstrengur frá Höfn er orðinn yfirlestaður vegna mikillar aukningar í Öræfum.

Til endurnýjunar og aukningar á dreifikerfum til sveita með jarðstrengslögnum og jarðspennistöðvum er áformað að verja 1.913 mkr. og í dreifikerfi í þéttbýli verður varið 524 mkr.

Á næsta ári hefst einnig vinna við uppsetningu á nýju fjargæslukerfi sem hefur verið í undirbúningi um nokkurn tíma. Reiknað er með að 212 miljónum verði varið til þess verkefnis á næsta ári, en verklok eru áætluð á árinu 2020.

Vinna við hitaveitu fyrir Höfn í Hornafirði heldur áfram á árinu 2019. Flest leyfismál eru nú í höfn, nægilegt heitt vatn fundið á Hoffelli fyrir hitaveitu og stefnt er að lögn stofnæðar, byggingu dælustöðva og tengingu við núverandi innanbæjarkerfi á Höfn á árinu 2019.