Umfangsmiklar truflanir í landskerfinu

Báðar þessar línur eru hluti af byggðalínuhring flutningskerfisins sem er í eigu Landsnets. Orsök bilunar reyndist vera slitin skálakeðja á Hrútatungulínu 1 í tengivirkinu á Vatnshömrum sem komið er til ára sinna. Á tímabili var rafmagnslaust á öllu Vesturlandi og í Húnaþingi vestra. Ágætlega gekk að koma rafmagni á aftur í Húnaþingi vestra og í Dalabyggð, en lengra rafmagnsleysi varð í Borgarbyggð og á Snæfellsnesi.

Öll raforka fyrir Snæfellsnes, Borgarfjörð og Mýrar fer um tengivirkið í Vatnshömrum, en auk þess er Landsnet aðeins með eina fæðingu inn á Snæfellsnesið og er flutningskerfið komið nokkuð til ára sinna á þessu svæði. Ýmislegt var gert til að reyna að koma rafmagni til sem flestra meðan á viðgerðum stóð hjá Landsneti m.a. eftir 66 kV línu frá Akranesi, en síðan voru virkjanir keyrðar upp og varavélar gangsettar. Andakílsárvirkjun sem nú er keyrð beint inn á dreifikerfið tók stóran hluta af álagi í Borgarfirði og virkjanir á Snæfellsnesi keyrðu með varavélum í Ólafsvík sem ræstar voru um kl. 23, en skammta þurfti raforku þar á meðan á þeirri keyrslu stóð. Hins vegar voru varavélar Landsnets sem nýlega voru settar upp í Vogaskeiði ekki keyrðar þótt þær væru að mestu tilbúnar til notkunar, þar sem talið var við að viðgerð tæki styttri tíma en raun varð á. Kerfið var komið í eðlilegan rekstur kl. 02:15 aðfaranótt mánudagsins.