Sliti forðað á stofnstreng við Jökulsá á Sólheimasandi

Á síðasta ári var lokið við að leggja 36 kV stofnstreng til Víkur í Mýrdal frá flutningskerfi Landsnets á Landeyjasandi. Þessi strengur leysti af hólmi loftlínu sem áður sá um raforkuafhendingu til Víkur og nágrennis og sem hafði oft valdið usla í vondum veðrum. Alla jafna bila strengir síður en loftlínur, en hreyfing á jarðvegi, gröftur, flóð og slíkt geta þó valdið því að strengir skemmast. Umræddur stofnstrengur þverar meðal annars Jökulsá á Sólheimasandi en hann var ásamt ljósleiðara lagður á þriggja metra dýpi undir botn árinnar.  

Um þessar mundir er Vegagerðin að byggja nýja tvíbreiða brú yfir ána og hefur sú framkvæmd haft í för með sér efnisflutninga í ánni. Þessir efnisflutningar og miklir vatnavextir vegna úrkomu virðast hafa grafið frá strengnum og ljósleiðaranum sem með honum liggur. Í vikunni urðu menn varir við að ljósleiðarinn var tekinn að færast til sem endaði á því að hann slitnaði. Ljóst var að þetta skapaði mikla hættu á að stofnstrengurinn færi sömu leið. Því var strax farið í að tryggja nægilegt varaafl fyrir Vík og sveitirnar í kring ef strengurinn myndi slitna auk þess sem undirbúin var lagning á nýjum strengbút í stað þess sem liggur undir skemmdum í ánni. Færanleg vél var send til Víkur og í gær hófust svo framkvæmdir við að leggja nýjan strengbút og tengja við kerfið. Starfsmenn RARIK á Suðurlandi unnu að þessu verki í gær og í nótt og voru keyrðar varavélar á Vík þannig að enginn varð rafmagnslaus meðan á aðgerðum stóð. Kerfið var komið í eðlilegan rekstur um kl. 7 í morgun.