Rekstur Herjólfs á rafmagni gengur vel

Nýi Herjólfur er tvíorkuskip sem gengur fyrir rafmagni og olíu þegar á þarf að halda. Komið hefur verið upp turnum til að hlaða rafhlöður skipsins á báðum áfangastöðum, í Landeyjarhöfn og í Vestmannaeyjum. Hleðsluturninn í Landeyjarhöfn tengist dreifikerfi RARIK og tekur um 30 mínútur að hlaða. Skipið siglir nú sex ferðir á milli Vestmannaeyja og Landeyjahafnar og við góðar aðstæður siglir það eingöngu fyrir rafmagni. Laugardaginn 22. ágúst sigldi Herjólfur sína fyrstu ferð á rafmagninu einu saman frá Landeyjahöfn. Fram að því hafði ferjan siglt á rafmagni frá Vestmannaeyjum og olíu til baka.

Í frétt Morgunblaðsins kemur fram að Herjólfur noti í dag í mesta lagi 2.500 lítra af olíu á viku en myndi nota 35 þúsund lítra af olíu á viku ef það gengi ekki fyrir rafmagni. Þess má geta að eldri Herjólfur notaði um 55.000 lítra á viku en nýja skipið er mun eyðslugrennra þótt það flytji meira.

Hjörtur Emilsson framkvæmdastjóri Navis sem er Vegagerðinni til ráðuneytis við útgerð skipsins segir að ávinningur af rafvæðingunni sé ekki aðeins minni rekstrarkostnaður og að notuð sé innlend orka. Minna kolefnisspor sé af rekstrinum, viðhaldskostnaður lægri og siglingin þægilegri fyrir farþegana.