Árið 2019 tilkynnti RARIK strengvæðingu raforkukerfisins á Íslandi inn á verkefnalista heimsmarkmiða Sameinuðu þjóðanna og á árinu 2020 var snjallmælaverkefni RARIK bætt inn á listann.
Heimsmarkmið Sameinuðu þjóðanna er áætlun um sjálfbæra þróun sem aðildarríki Sameinuðu þjóðanna samþykktu 2015 og fela í sér heildstæða nálgun þar sem þrjár stoðir sjálfbærrar þróunar, efnahagurm samfélag og náttúran eru lagðar til grundvallar.
Markmið strengvæðingarverkefnis RARIK er að efla raforkukerfið með því að færa loftlínur í jarðstrengi og auka þannig raforkuöryggi í dreifbýli og draga úr truflunum í dreifikerfinu vegna veðurs og áflugs fugla. Viðhaldsþörf minnkar sem dregur úr losun gróðurhúsalofttegunda og álagi á umhverfið við akstur og þjónustu línukerfisins. Með auknu afhendingaröryggi er jafnframt minni þörf fyrir að keyra dísilknúnar varaaflsstöðvar. Verkefnið er á áætlun.
Framvinda strengvæðingar: | 2018 | 2019 | 2020 |
Hlutfall háspennudreifikerfis raforku sem hefur verið strengvætt | 62% | 65% | 69% |
Sem fyrr segir var snjallmælaverkefni RARIK bætt á verkefnalistann á síðasta ári. Verkefnið felur í sér að skipta út orkumælum í dreifikerfi RARIK um allt land fyrir snjallmæla á næstu sex árum. Með þessum nýju orkumælum munu reikningar viðskiptavina byggja á upplýsingum um raunverulega notkun hvers mánaðar í stað áætlunar og uppgjörsreiknings í kjölfar álesturs. Viðskiptavinir geta því fylgst betur með orkunotkun sinni, gripið fyrr inn í ef notkunin þykir óeðlileg og dregið þannig úr óþarfa orkunotkun.
Sími: 528 9000
Opið:
Mán-fim 9-16 og fös 9-15