RARIK hættir rekstri götulýsingar

Síðustu árin hefur verið unnið við að koma á samningum við Vegagerðina og fjörtíu sveitarfélög á orkuveitusvæði RARIK um afhendingu götulýsingar. Vegagerðin yfirtók sinn rekstur 1. janúar 2018 og síðasta sveitarfélagið yfirtók reksturinn 1. nóvember síðastliðinn. Lokaskrefin í þessu ferli verða tekin nú um áramótin þegar nokkur lítil kerfi sem falla fyrir utan það sem fyrir er nefnt, verða afhent nýjum eigendum.

Uppsetning og rekstur götuljósa var eitt sinn hluti af reglulegri starfsemi dreifiveitna en sveitarfélög og Vegagerðin greiddu fyrir uppsetningu þeirra og rekstur. Skv. raforkulögum nr. 65/2003 fellur götulýsing hvorki undir einkaleyfisstarfsemi dreifiveitna né kemur inn í tekjuheimildir þeirra og hefur því verið haldið utan við einkaleyfisstarfsemina. Æskilegt og eðlilegt var því talið að færa eignarhald og rekstur götuljósakerfanna til þeirra sem bera ábyrgð á vegakerfinu.

---

Fréttin var uppfærð 16.11.2020.