RARIK aðili að loftlagsyfirlýsingu

02.03.2021

Föstudaginn 26. febrúar 2021 undirrituðu fulltrúar RARIK og 19 annarra fyrirtækja og stofnana Loftslagsyfirlýsingu Festu og Sveitarfélagsins Hornafjarðar. Við það tækifæri var kynnt ný stefna fyrir Sveitarfélagið Hornafjörð þar sem áhersla er lögð á innleiðingu heimsmarkmiða Sameinuðu þjóðanna auk þess sem frumsýnt var myndband um umhverfisvænar áherslur sveitarfélagsins.

Loftslagsverkefni Festu og Sveitarfélagsins Hornafjarðar er ætlað að hvetja fyrirtæki og stofnanir til að setja sér markmið um loftslagsmál, hefja aðgerðir, mæla árangur þeirra og birta markmið og niðurstöður. Loftslagsyfirlýsingin fellur vel að stefnumótun RARIK í umhverfismálum og aðgerðaáætlun fyrirtækisins í loftslagsmálum.

Forgangsmál að minnka kolefnisspor RARIK

Við skilgreiningu á kolefnisspori RARIK er notast við Greenhouse Gas Protocol staðalinn (GGP). Í honum er losun gróðurhúsalofttegunda skipt upp samkvæmt umfangi. Umfang 1 felur í sér alla beina losun gróðurhúsalofttegunda hjá fyrirtækinu. Umfang 2 er losun sem verður vegna framleiðslu rafmagns sem fyrirtækið kaupir. Umfang 3 er óbein losun sem kemur til vegna vöru og þjónustu sem fyrirtækið nýtir sér. Það er í forgangi hjá RARIK að draga úr losun gróðurhúsalofttegunda og minnka þar með kolefnissporið eftir fremsta megni og hefur fyrirtækið sett sér það markmið að hafa helmingað losun gróðurhúsaloftegunda í umfangi 1 árið 2030.

Að jafnaði má rekja um þriðjung af losun gróðurhúsalofttegunda hjá RARIK í umfangi 1, til losunar vegna keyrslu varaafls, þriðjung vegna reksturs á bíla- og tækjaflota RARIK og þriðjung vegna raforkuvinnslu með jarðefnaeldsneyti. Um 5% af kolefnisspori RARIK í umfangi 1 má svo rekja til reksturs á fjarvarmaveitum. Heildarlosun gróðurhúsalofttegunda vegna þessa þátta hjá RARIK nam 2.118 tonnum af CO2 árið 2020.