Hafin er bygging á nýrri aðveitustöð á Sauðárkróki sem mun tengjast bæði núverandi línu Landsnets til Sauðárkróks og 66 kV streng sem Landsnet leggur um þessar mundir. Auk þess hefur verið unnið að miklum endurbótum á starfsstöð RARIK í bænum.
Tveir 66/11 kV spennar verða í stöðinni 20 MW hvor, ásamt 33/11 kV spenni fyrir 33 kV lögn að Brimnesi. Þá verður í stöðinni 11 kV rofasett sem tengir bæjarkerfið inn á hana auk þess sem að bæjarkerfið verður styrkt. Með þessu eykst afhendingargeta RARIK á svæðinu, auk þess sem að tvöföld tenging við Varmahlíð á vegum Landsnets og tveir spennar fyrir bæinn auka mjög afhendingaröryggi svæðisins.
Bylting í aðbúnaði starfsmanna
Í sumar var unnið að gagngerum endurbótum á starfsstöð RARIK á Sauðárkróki sem hafa gjörbreytt vinnuaðstöðu starfsfólks og má jafnvel líkja við byltingu. Húsnæðið var tekið í gegn í hólf og gólf, skipt út helstu kerfum og lögnum eins og rafmagns-, neysluvatns- og tölvulögnum um leið og aðgangs-, bruna- og öryggiskerfi voru endurnýjuð. Komið var upp fullbúinni búningsaðstöðu fyrir bæði kyn ásamt skápum fyrir útifatnað auk þess sem fjarfundaraðstaða var sett upp í kaffistofu um leið og innréttingar voru endurnýjaðar.
Breytt skipulag skrifstofurýmis hefur mælst vel fyrir og tölvuaðstaða vinnuflokks hefur batnað og er nú svigrúm til að vinna bæði í stærri hópum eða loka sig af þegar unnið er með trúnaðarupplýsingar. Þá hefur lýsing í vinnurýmum verið endurnýjuð. Þegar endurbótum lauk var að sjálfsögðu splæst í nýja inniskó á allt starfsliðið til að setja punktinn yfir i-ið.
Sími: 528 9000
Opið:
Mán-fim 9-16 og fös 9-15