Í lok ágúst efndi RARIK til tveggja útboða vegna kaupa á raforku til reksturs fyrirtækisins. Annars vegar var um að ræða kaup á um það bil 5,5 GWst/ári af forgangsorku til eigin nota í húsnæði og veitukerfi RARIK en hins vegar innkaup á raforku vegna þeirrar orku sem tapast við dreifingu raforku í veitukerfi fyrirtækisins, tæplega 80 GWst/ári.
Útboðin voru auglýst á Evrópska efnahagssvæðinu og hafði verkfræðistofan Efla umsjón með báðum útboðum. Fimm tilboð bárust í hvoru útboði og mælir Efla með að gengið verði til samninga við lægstbjóðendur í báðum tilfellum.
Í útboði á raforkukaupum til eigin nota RARIK, það er vegna notkunar á útgerðarstöðum, skrifstofum, aðveitustöðvum, auk annarrar mældrar forgangsorkunotkunar var Orkusalan lægstbjóðandi en hún bauð 3,89 kr/kWst. Í útboði á raforkukaupum vegna tapa í dreifikerfi RARIK átti ON lægsta boð og er meðalverð í tilboði þeirra 4,08 kr/kWst.
Ákveðið hefur verið að taka tilboðum lægstbjóðenda og er miðað við að á næstunni verði gengið frá samningum við þá, en samningarnir taka gildi um næstu áramót.
Sími: 528 9000
Opið:
Mán-fim 9-16 og fös 9-15