Jarðstrengur og ný aðveitustöð auka raforkuöryggi í Breiðdal

Verið er að leggja nýjan 33 kV jarðstreng á milli Stöðvarfjarðar og Breiðdalsvíkur sem mun leysa af hólmi núverandi loftlínu um Fossdalsskarð auk nokkurra loftlína í nágrenni Breiðdalsvíkur. Um leið verður aðveitustöð á Ormsstöðum í Breiðdal tekin úr notkun og ný aðveitustöð tekin í notkun nær þorpinu í Breiðdalsvík. Lokið verður við að plægja niður jarðstrenginn á næstu vikum en vinna við það hófst í mars. Bygging aðveitustöðvarinnar hófst í byrjun apríl og lýkur uppsteypu hennar í sumar og tekur þá við vinna við uppsetningu rafbúnaðar, frágang utanhúss og utan um nýjan spenni. Miðað er við að tengingu við nýja aðveitustöð ljúki í byrjun næsta árs.

Alls er jarðstrengurinn sem nú er verið að plægja niður á milli Stöðvarfjarðar og Breiðdalsvíkur 14,6 km að lengd og að þessu verki loknu verður 33 kV dreifikerfi RARIK frá flutningskerfi Landsnets á Fáskrúðsfirði að Breiðdalsvík að mestu komið í jarðstreng.