Í sumar hefur verið haldið áfram að endurnýja loftlínukerfi RARIK með nýjum þriggja fasa jarðstrengjum. Með þessu eykst afhendingaröryggi raforku en dreifikerfið hefur iðulega orðið fyrir miklum skemmdum í óveðrum með tilheyrandi raforkutruflunum hjá notendum.
Allt stefnir í að um 250 kílómetrar af jarðlínum verði lagðir í jörðu á vegum RARIK í ár en þar af eru rúmlega 100 kílómetrar á Norðurlandi þar sem miklar skemmdir urðu á dreifikerfinu í óveðrinu í desember í fyrra. Þá brotnuðu 150 staurar á Norðurlandi og meira en 20 línur slitnuðu. Sérstöku fjármagni var veitt til að flýta framkvæmdum á svæðum sem urðu illa úti í þessum veðrum og voru lagðir um 84 kílómetrar af jarðstrengjum vegna þeirra. Alls nemur kostnaður vegna strenglagna á Norðurlandi í ár um 1.600 milljónum króna en þar af eru um 600 milljónir króna vegna flýtiframkvæmda.
Meðfylgjandi myndir voru teknar í veðurblíðunni í haust af starfsmönnum RARIK við strenglagnir á svæðum sem urðu illa úti í óveðrum síðasta vetrar. Annars vegar er mynd úr Hörgárdal þar sem 10 kílómetra strengur var plægður niður um Hörgárdal í Garðshorn og hins vegar mynd af vinnu við 10 kílómetra streng í yfir í Sveinbjarnargerði í Eyjafirði en með honum er komin varaleið til Grenivíkur. Þess er vænst að með þessum framkvæmdum hafi geta dreifikerfis RARIK á Norðurlandi til að mæta óveðrum framtíðarinnar aukist til muna.
Sími: 528 9000
Opið:
Mán-fim 9-16 og fös 9-15