Fyrsta skóflustunga að nýrri svæðisskrifstofu RARIK á Suðurlandi

22.01.2021

Í dag, föstudaginn 22. janúar tóku forstjóri RARIK og yfirmenn fyrirtækisins á Suðurlandi fyrstu skóflustungu að byggingu nýrrar svæðisskrifstofu RARIK á Suðurlandi sem mun rísa við Larsenstræti 4 á Selfossi. Nýja svæðisskrifstofan og aðstaðan við hana mun auka hagræði í rekstri RARIK á Suðurlandi og jafnframt bæta vinnuskilyrði starfsmanna fyrirtækisins á svæðinu. Miðað er við að byggingarframkvæmdir verði boðnar út á vormánuðum og stefnt er að því að nýja svæðisskrifstofan verði tekin í notkun á árinu 2022.

Tvær byggingar og athafnasvæði

Um er að ræða tvær byggingar samtals 1.559,9m² að stærð. Annars vegar 1.397 m² húsnæði fyrir lager, bílgeymslu, skrifstofuhluta og starfsmannaaðstöðu og hins vegar 167,2m² aðstöðuhús þar sem verður geymsla á búnaði útiflokka, varaaflstöð og hjólageymsla fyrir starfsmenn auk athafnasvæðis fyrir grófvörur á bakhluta lóðarinnar. Í nýju svæðisskrifstofunni við Larsenstræti verður aðstaða fyrir 24 starfsmenn að jafnaði en gert er ráð fyrir að þar geti allt að 35 manns af skrifstofu og útiflokkum starfað í einu.

Ánægjuleg tímamót

Tryggvi Þór Haraldsson forstjóri RARIK segir þetta ánægjuleg tímamót. „Þetta verkefni hefur átt sér langan aðdraganda en það er orðið mikilvægt að bæta aðstöðu starfsmanna okkar í Árnessýslu. Hér hefur verið mikil uppbygging á undanförnum árum og má sem dæmi nefna að nýjar heimtaugar á Suðurlandi og reyndar mest í Árnessýslu, hafa verið fleiri á undanförnum árum en samanlagt á öllum öðrum starfssvæðum RARIK, jafnvel eru dæmi um að þær hafi verið tvöfalt fleiri. Starfsemi RARIK hefur verið á þremur stöðum á Selfossi, en með þessum byggingum næst að sameina starfsemina í Árnessýslu á einn stað.“

Ný aðstaða RARIK á Selfossi mun rísa á lóð sem stendur innst í botnlanga við Larsenstræti. Lóðin verður malbikuð með bílastæðum fyrir starfsmenn og gesti meðfram norður og austurhlið hússins.

Aðkoma inn á lóðina verður um sameinginlega innkeyrslu að norðanverðu og útkeyrsla að sunnanverðu. Lóðin verður girt af og lokað inn á athafnasvæði með rafknúnum hliðum.

PRO-Ark ehf eru aðalhönnuðir verkefnisins, burðarvirkis- og lagnahönnun annaðist Verkfræðistofa Reykjavíkur, Raflagnahönnun annaðist Dolli Raflagnahönnun og Brunahönnun slf. sá um brunahönnun.