Dagur rafmagns

23.01.2019

Í dag, 23. janúar, er dagur rafmagnsins en haldið hefur verið upp á hann á Norðurlöndunum um nokkurra ára skeið. Á þessum árstíma þegar stutt er frá vetrarsólstöðum skal engan undra þó íbúar á norðurslóðum hafi tekið þennan sið upp, þegar myrkur er sem mest. Við gleðjumst yfir því að sólin fer hækkandi á lofti og daginn er aftur farið að lengja um eitt hænufet daglega.

Í tæknivæddu samfélagi nútímans er erfitt að hugsa sér daglegt líf án rafmagns, svo samofið er það öllu sem við tökum okkur fyrir hendur. Það er flókið nákvæmnisverk að flytja, dreifa og afhenda rafmagn með öruggum hætti til heimila og til orkufreks reksturs fyrirtækja í landinu.

RARIK rekur umfangsmesta rafdreifikerfi á Íslandi sem nær til um 90% af sveitum landsins og til 43 þéttbýliskjarna. Lengd dreifikerfisins er um 9.000 km og þar af eru um 60% jarðstrengir. Væri kerfið ein samfelld lína væri hún jafnlöng vegalengdinni frá Reykjavík til Tokýó í Japan. Við hjá RARIK munum eins og áður leitast við að svara orkuþörf landsmanna, með öruggum hætti.