Hagnaður RARIK á árinu 2018 var um 2,8 milljarðar króna og rekstrarhagnaður fyrir afskriftir, fjármagnsliði og skatta (EBITDA) nam 5.6 milljörðum króna. Fjárfestingar ársins voru 3,7 milljarðar.
Samkvæmt rekstrarreikningi nam hagnaður ársins 2.781 milljónum króna sem er svipað og áætlanir gerðu ráð fyrir, en hækkaði um tæp 11% frá árinu 2017 þegar hagnaður ársins nam 2.507 milljónum króna. Reiknuð áhrif hlutdeildarfélagsins Landsnets hækkuðu og voru 909 milljónir króna en voru 670 milljónir á árinu 2017. Heildarhagnaður að teknu tilliti til þýðingarmunar hlutdeildarfélags nam 3.712 milljónum króna.
Rekstrarhagnaður fyrir afskriftir, fjármagnsliði og skatta (EBITDA) nam 5.569 milljónum króna eða 33,5% af veltu ársins, samanborið við 32,0% á árinu 2017. Handbært fé frá rekstri nam 3.755 milljónum króna.
Rekstrartekjur hækkuðu um tæplega 12% frá árinu 2017 og námu 16.637 milljónum króna og rekstrargjöld hækkuðu á milli ára um tæp 10% og námu 13.022 milljónum króna.
Rekstrarhagnaður af starfsemi RARIK fyrir fjármagnsliði (EBIT) á árinu 2018 nam 3.615 milljónum króna sem er rúmlega 20% hækkun frá fyrra ári. Veiking íslensku krónunnar gagnvart erlendum gjaldmiðlum og aukin verðbólga á árinu gerðu það að verkum að fjármagnsliðir voru umtalsvert óhagstæðari en á fyrra ári. Fjármagnsgjöld umfram fjármagnstekjur námu um 1.274 milljónum króna, en á árinu 2017 námu þau 706 milljónum króna.
Samkvæmt efnahagsreikningi námu heildareignir RARIK í árslok 65.953 milljónum króna og hækkuðu um 7.488 milljónir króna á milli ára. Heildarskuldir námu 24.821 milljónum króna og hækkuðu um 4.086 milljónir króna frá fyrra ári. Eigið fé var 41.132 milljónir króna og er eiginfjárhlutfall því 62,4% samanborið við 64,5% í árslok 2017. Fjárfestingar ársins að frádregnu söluandvirði seldra rekstrarfjármuna námu 3.695 milljónum króna, sem er minna en áætlað var en 297 milljónum króna hærra en árið á undan.
Stjórn RARIK ohf. leggur til við aðalfund að greiddar verði 310 milljónir króna í arð til eiganda RARIK sem er Ríkissjóður Íslands.
Samstæðuársreikningur RARIK ohf. er gerður samkvæmt alþjóðlegum reikningsskilastöðlum.
Horfur í rekstri RARIK á árinu 2019 eru góðar. Gert er ráð fyrir að hagnaður ársins af reglulegri starfsemi samstæðunnar verði sambærilegur og á árinu 2018 en að fjárfestingar aukist talsvert á milli ára.
Ársreikningur RARIK 2018 var samþykktur á fundi stjórnar þann 28. febrúar, 2019 og heimilaði stjórn birtingu hans í Kauphöll Íslands.
Nánari upplýsingar veitir Tryggvi Þór Haraldsson, forstjóri RARIK í síma 528-9000.
Sími: 528 9000
Opið:
Mán-fim 9-16 og fös 9-15