Um er að ræða stórt verkefni þar sem hraun þekur mestan hluta strengleiðarinnar í vegkanti, sem gerir verkið flókið, krefjandi og erfitt yfirferðar.
Nú er unnið að 25 km jarðstrengslögn í Aðaldal í Suður-Þingeyjarsýslu sem tekur við af gömlu loftlínukerfi sem reist var á árunum 1952-1962. Búið er að bora göt undir vegi og í síðustu viku var hafist handa við sjálfa jarðstrengslögnina. Þriggja fasa jarðstrengur verður plægður frá Tjörn í Aðaldal að Heiðarenda fyrir norðan Aðaldalsflugvöll auk tenginga að Sandsbæjum til vesturs, Nesbæjum til suðurs og að Núpum austan Laxár. Gamla loftlínukerfið var þriggja fasa að undanskildum 6 km einfasa álmum sem endurnýjast yfir í þriggja fasa jarðstrengskerfi.
Um er að ræða stórt verkefni í endurnýjunaráætlun dreifikerfis RARIK þar sem loftlínur víkja markvisst fyrir jarðstrengjum. Aðaldalshraun þekur mestan hluta strengleiðarinnar sem gerir verkið í senn flókið og krefjandi enda um viðkvæmt svæði að ræða. Unnið verður í vegköntum með sérstöku leyfi Vegagerðarinnar til að lágmarka rask auk þess sem fengið var leyfi frá Umhverfisstofnun til að vinna í friðlandinu í kringum Laxá og í hrauninu í Aðaldal.
Verkefnið hefur verið í undirbúningi í 2-3 ár og er m.a. notaður sérstakur jarðstrengur í verkið með tvöfaldri kápu sem á að þola betur meðferð í hörðu hrauninu. Þessi gerð af jarðstreng hefur þegar verið notuð í sambærileg en minni verk.
Dreifikerfið í Aðaldal hefur orðið fyrir miklum truflunum í gegnum tíðina vegna áflugs álftna á loftlínur bæði að vori og hausti auk annarra bilana sökum aldurs kerfisins. Hinir nýju jarðstrengir munu auka rekstraröryggi dreifikerfisins og draga úr sjónrænum áhrifum þess.
Sími: 528 9000
Opið:
Mán-fim 9-16 og fös 9-15