Í febrúar 2008 var stofnað dótturfélag hjá RARIK ohf. sem ber heitið RARIK Orkuþróun ehf. Var það gert í kjölfar stefnumótunarvinnu stjórnar RARIK ohf. í árslok 2007, þ.e. að stofna sjálfstætt fyrirtæki til að halda utan um ráðgjafa- og þróunarverkefni RARIK innanlands og utan.
Tilgangur félagsins er að vinna að, þróa, byggja og reka hvers konar orkukerfi hérlendis sem erlendis þ.á.m. uppbygging og rekstur á dreifi- og flutningskerfi fyrir raforku og hitaveitu svo og bygging og rekstur hvers konar orkuvera. Meginmarkmiðið er að tryggja áframhaldandi vöxt og verðmætasköpun innan RARIK samstæðunnar.
Í ljósi þess að RARIK hefur fyrst og fremst sinnt uppbyggingu og rekstri flutnings- og raforkudreifikerfa, lítilla og meðalstórra vatnsaflsvirkjana og hitaveitna er talið eðlilegt að þungamiðjan í útrásinni verði á þessum vettvangi. Ákveðið var að leggja félaginu til beina fjármuni í formi hlutafjár, en enn fremur er gert ráð fyrir að þróunarverkefni innanlands verði lögð inn í fyrirtækið t.d. á vegum Héraðsvatna ehf. og Sunnlenskrar orku ehf.
Steinar Friðgeirsson er framkvæmdastjóri RARIK Orkuþróunar ehf. Heimilisfang félagsins er að Bíldshöfða 9, 110 Reykjavík. Erlent hjáheiti félagsins er RARIK Energy Development Ltd. skammstafað RED.
