Virkjanir undir 7 MW tengjast raforkukerfi landsins um kerfi dreifiveitu. Áður en framkvæmdir við virkjanir hefjast þarf nýr virkjunaraðili að hafa samband við veitusvið RARIK og kanna hvort mögulegt er að tengja virkjun af fyrirhugaðri stærð við dreifikerfið á viðkomandi stað. Hugsanlega þarf að ráðast í styrkingu kerfisins svo það sé unnt og getur það haft áhrif á tengikostnað. Í kjölfarið er gerður tengisamningur milli virkjunar og RARIK um tenginguna en eftir það er unnt að hefjast handa við lokaundirbúning verkefnisins. Þegar hönnun er lokið er unnt að gera samrekstrarsamning virkjunar og RARIK og hefja framkvæmdir.
Virkjanir sem tengdar eru dreifikerfinu greiða fast árlegt gjald fyrir tenginguna skv.verðskrá RARIK fyrir innmötun virkjana, sem háð er stærð. Vegna hagræðis sem virkjunin skapar dreifiveitunni fá virkjunir undir 300 kW síðan árlega greiðslur sem nema lækkun úttektar RARIK í afhendingarstað Landsnets. Þessar greiðslur fara hlutfallslega lækkandi með stærð (sjá verðskrá hér til hliðar). Þá þarf virkjunaraðili einnig að greiða tengigjald í upphafi, en það er háð m.a. tilkostnaði vegna tengingarinnar.
Frekari upplýsingar eru veittar í síma 528 9000 eða með því að senda tölvupóst. Sjá einnig hér hægra megin á síðunni gátlista um helstu atriði tengiferilsins, skjalasnið tengisamnings og samrekstrarsamning fyrir litlar virkjanir og stærri.
Í dag eru vel á þriðja tug virkjana af ýmsum stærðum og gerðum tengdar dreifikerfi RARIK. Nemur uppsett afl þeirra í heild um 21 MW.
