|
|
|
|
|
|
|
Heitt vatn
|
Er notkunin eðlileg?
Þegar þú veltir því fyrir þér hvort orku- og heitavatnsnotkun þín sé eðlileg eða of mikil má oft hafa gagn af viðmiðunartölum. Varmanýting verður að teljast góð þegar notuð eru 1,2 - 1,7 tonn (rúmmetrar) af heitu vatni fyrir hvern rúmmetra húsnæðis á ári. Á þetta við um meðalstór einbýlishús. Í stórum húsum þarf að öllu jöfnu hlutfallslega minna vatn en í litlum húsum, í fjölbýli ætti notkun t.d. að vera hlutfallslega mun minni, vegna færri útveggja íbúða.
Reynslan sýnir að í gömlum húsum þarf yfirleitt meira vatn til upphitunar en í nýjum. Vatnsnotkun til upphitunar helst í hendur við veðurfar. Það er eðlilegt að notkun sé nokkuð mikil á veturna og lítil á sumrin.
Einangrun og notkunarvenjur
Varmatap húsa helst í hendur við einangrun glers og veggja. Húsnæði, sem er vel einangrað, þarf minni varma til upphitunar og ofnar nýtast betur. Minni varma þarf til hitunar þar sem tvöfalt gler er haft í gluggum í stað einfalds og má þar ná fram verulegum sparnaði. Oft má spara mikinn varma án mikils kostnaðar og umstangs með aukinni einangrun í þaki, sem oft er ábótavant, sérstaklega í eldri húsum.
Góð regla er að hafa ekki glugga lengi opna þegar kalt er í veðri, heldur loftræsa duglega í stuttan tíma og lækka stillinguna á ofnloka herbergisins á meðan.
Innihiti hefur áhrif á varmanotkun þína. Því hærri sem innihitinn er, þeim mun meiri verður orku- og heitavatnsnotkun þín. Áætla má að upphitunarútgjöld þín hækki um allt að 6% fyrir hverja gráðu sem innihitinn er stilltur yfir 20°C.
|
|
|
|
Gott hitakerfi
Gott hitakerfi er þegar þægilegur innihiti er í húsum (20°C) og allir ofnar virðast kaldir neðst við snertingu (25-30°C). Hafðu það fyrir reglu, og fáðu heimilisfólk þitt í lið með þér, að þreifa reglulega á neðsta hluta ofna. (Góð viðmiðun er að taka á einhverjum málmhlut í herberginu, t.d. hurðarhúni, en hann er um 20°C heitur). Ef þetta tvennt er ekki í lagi, þ.e. innihiti þægilegur og ofnar kaldir (volgir) viðkomu neðst, er eitthvað að og líklegt að þú sért að sóa fjármunum þínum að óþörfu.
|
|
|
Stilling hitakerfa
Ef hitakerfi er ekki í jafnvægi fer of mikið vatn um suma ofna og varmanýting þeirra verður slæm. Einstaka ofnar verða útundan og fá ekki nægjanlegt vatn þannig að misheitt verður í húsinu. Mikilvægt er að tryggja að hámarksrennsli til allra ofna sé takmarkað eftir afkastagetu þeirra (Kv-gildi) og að bakrásarhiti sé álíka frá öllum ofnunum. Reynslan sýnir að oft vantar nokkuð upp á að hitakerfi séu rétt stillt. Þetta á ekki síst við um kerfi þar sem sjálfvirkir framlokar eru notaðir til að halda stöðugum hita í hverju herbergi. Þrýstifall í þrýstijafnara og lokum verður að vera hæfilegt, og þess vegna er skynsamlegt að fá fagmenn til að athuga kerfi ef grunur leikur á að það sé vanstillt.
Veistu til dæmis:
*Að hægt er að læsa ofnlokum og koma þannig í veg fyrir yfirstillingar?
*Að nýju gerðirnar af framlokum hafa innbyggða Kv-gildisstillingu, sem kemur í veg fyrir sóun vatns?
*Að nýju gerðirnar af framlokum vinna mun hraðar og nákvæmar en þær eldri og nýta þess vegna vatnið betur?
*Að stilla þarf bakloka eftir árstíðum þannig að þeir sói ekki vatni?
*Að stilla þarf þrýstijafnara eftir árstíðum þannig að þeir sói ekki vatni?
*Að ef þrýstijafnari er t.d. stilltur á 4 í stað 1 þá nota ofnarnir helmingi meira vatn en annars, við sömu opnun í ofnlokum?
*Að komnir eru á markaðinn neysluvatns-varmaskiptar, sem eru í mörgu heppilegri en t.d. gömlu hitakútarnir?
*Að kominn er á markaðinn stjórnloki, sem er sérstaklega gerður til að stjórna neysluvatnsnotkun þinni, þannig að besta nýting á heita vatninu sé tryggð?
*Að kominn er á markaðinn einfaldur búnaður til utaná liggjandi pípulagna?
RARIK vill hvetja þig til að íhuga vel hvernig ástatt er um varmanýtingu hitakerfis þíns.
|
|
|
|
|
|
|
|
|
