Stjórn RARIK samþykkti nýlega nokkrar breytingar á verðskrá RARIK fyrir dreifingu. Ekki er um að ræða breytingu á tekjum RARIK. Orkustofnun hefur fallist á ofangreindar breytingar með bréfi dagsettu 28. október síðastliðinn.
Í fyrsta lagi er um að ræða einföldun á töxtum auðkenndum VO110 (fyrir þéttbýli) og VO130 (fyrir dreifbýli), sem verið hafa "tvígjaldstaxtar", þ.e. taxtar með tveggja þrepa orkugjaldi, sem gerir reikningana flókna fyrir viðskiptavininn. Nú verður aðeins eitt orkugjald og fastagjald. Fastagjaldið mun hækka, en orkugjald lækka hlutfallslega. Breytingin leiðir af sér lítilsháttar hækkun hjá þeim notendum sem nota færri en 4.000 kWh á ári, eða 1-200 krónur á mánuði , en lækkun hjá þeim sem nota milli 4.000 og 43.000 kWh á ári. Þar á meðal eru um 14.000 heimili. Þrátt fyrir þessa hagræðingu og einföldun munu heildartekjur fyrirtækisins af töxtunum ekki breytast. Umrædd breyting tekur gildi 1. desember 2008.
Í öðru lagi er bætt við stórnotendatöxtum, annars vegar fyrir þéttbýli (VA410) og hins vegar fyrir dreifbýli (VA430), en þessum töxtum er ætlað að nýtast notendum með notkun sem er um eða meiri en 8 GWh á ári. Töxtunum fylgja sérstakir skilmálar um uppgjör notkunar, afhendingu orkunnar, tengigjald og kerfisframlag. Þessir taxtar taki gildi um áramótin.
Í þriðja lagi er upphæð seðilgjalds nú tilgreint í verðskrá með vísun til ákvæðis í reglugerð um framkvæmd raforkulaga. Umrædd breyting tekur gildi 1. desember nk. Upphæð gjaldsins er óbreytt.
