Fréttir frá rarik.is

Ný verðskrá fyrir tengigjöld

Mon, 30 Apr 2012 16:14:00 +0000

Ný verðskrá fyrir tengigjöld rafmagns tekur gildi þann 1. maí 2012. Verðskrá frá 2010 fellur þá úr gildi. Nokkrar breytingar verða á einstökum liðum, en almennt er um að ræða 5% hækkun grunngjalda. Verðskrána má finna hér á vefnum.

Aðalfundur RARIK 2012

Wed, 21 Mar 2012 14:19:00 +0000

Aðalfundur RARIK var haldinn í höfuðstöðvum fyrirtækisins föstudaginn 16. mars. Rekstur RARIK samstæðunnar á árinu 2011 var í samræmi við áætlanir og gekk ágætlega og var hagnaður í árslok rúmur milljarður.

Árni Steinar Jóhannsson, formaður stjórnar RARIK ohf. flutti ávarp við upphaf aðalfundarins. Hann sagði m.a. að nauðsynlegt sé að hefja af fullri alvöru umræðu um fyrirkomulag til jöfnunar á raforkukostnaði. Hann taldi að vel komi til álita að verja hluta af þeim tekjum sem ríkissjóður aflar nú í formi orkuskatta, til þess að jafna raforkuverð í landinu.

Um 2. áfanga rammaáætlunar sagði Árni að mikilvægt væri að ljúka þeirri vinnu sem fyrst af vandvirkni. Ef vikið er frá faglegri vinnu verkefnisstjórnarinnar og verulegar breytingar gerðar á röðun einstakra kosta er hætt við að ekki náist sátt um málaflokkinn.

Hann sagði það einnig koma á óvart að Hólmsárvirkjun sé ekki í nýtingarflokki, í ljósi þess hve upphaflegur virkjunarkostur í Hólmsá kom vel út í fyrsta hluta rammaáætlunar og hve mikið hefur verið gert til að minnka umhverfisáhrif með því að velja virkjuninni stað við Atley.

Að lokum þakkaði hann fyrir hönd stjórnar starfsmönnum RARIK fyrir fórnfús störf í þágu fyrirtækisins. “Við gerum okkur öll grein fyrir því, að velgengni fyrirtækisins á sínar styrku stoðir í þeim mannauði sem RARIK býr yfir”.

Ennfremur þakkaði Árni meðstjórnarmönnum sínum og forstjóra fyrirtækisins kærlega fyrir samstarfið á liðnu ári. „Um allar ákvarðanir ríkti algjör einhugur með stjórn og forstjóra sem ég tel hafa verið lykilinn að þeim árangri sem náðst hefur og að fyrirtækið stendur traust“.

Að svo mæltu sagði Árni Steinar þennan sjötta aðalfund RARIK ohf. settan, skipaði Lárus L. Blöndal sem fundarstjóra og Ólaf Hilmar Sverrisson sem fundarritara.

Tryggvi Þór Haraldsson forstjóri, flutti yfirgripsmikla skýrslu stjórnar og forstjóra um starfsemina á síðasta ári.

Rekstur RARIK samstæðunnar á árinu 2011 var í samræmi við áætlanir og gekk ágætlega eins og niðurstaða ársreiknings ber með sér. Fjármagnsgjöld reyndust þó hærri en búist var við, einkum vegna meiri verðbólgu en gert var ráð fyrir. Rekstraráætlanir ársins gerðu ráð fyrir áframhaldandi aðhaldi í rekstri, en dregið var nokkuð úr þeim mikla niðurskurði sem farið var í á árunum 2009 og 2010 sem m.a. fólst í frestun á fjölmörgum viðhalds- og endurnýjunarverkefnum við dreifikerfið.

Fjárfestingar á árinu voru alls 1.940 milljónir króna, þar af 1.116 milljónir vegna dreifikerfisins og 510 milljónir vegna stofnkerfis og endurnýjunar orkumæla.

Langstærsti hluti þess fjármagns sem veitt var til nýlagna, endurnýjunar og styrkingar dreifikerfisins fór til verkefna í dreifbýli, eða alls 947 milljónir. Eins og undanfarin ár var öll endurnýjun línukerfisins í formi þriggja fasa jarðstrengja og gat þess að undanfarin ári hafi árlega verið lagðir 2-3 hundruð km af hápennujarðstrengjum, í stað loftlína. Hlutfall jarðstrengja í raforkudreifikerfi í strjálbýli fer því ört vaxandi og er nú orðið um 43%.

Í samstæðu RARIK eru nú 3 dótturfélög; Orkusalan ehf., RARIK Orkuþróun ehf. (RED) og Ljós- og gagnaleiðari ehf. (LoG). Rekstur Orkusölunnar á sínu fimmta starfsári gekk vel og í samræmi við áætlanir, en hagnaður í árslok var 123 milljónir króna.

Skýrsla stjórnar og forstjóra er birt hér á heimasíðu RARIK

Að lokum sagði Tryggvi: „Ég vil nota þetta tækifæri til að þakka starfsmönnum RARIK og dótturfélaga fyrir frábært starf á árinu 2011, samheldni þeirra og samstöðu með fyrirtækinu. Þá vil ég þakka stjórn RARIK fyrir mjög ánægjulegt samstarf, samstöðu hennar í öllum ákvörðunum og nauðsynlegt aðhald sem hún hefur sýnt okkur starfsmönnum“.

Undir næsta dagskrárlið fór Tryggvi Þór Haraldsson yfir og kynnti ársreikning 2011.

Í máli hans kom fram m.a. að hagnaður að teknu tilliti til tekjuskatts var 1.014 milljónir króna.

Heildareignir RARIK samkvæmt efnahagsreikningi voru rúmir 37 milljarðar króna, skuldir í árslok voru um 18 milljarðar króna og eigið fé því um 19 milljarðar króna og eiginfjárhlutfallið 51,9%. Eigið fé RARIK hækkaði um 5,5% frá árinu 2010. Ekki var þörf fyrir sérstaka fjármögnun (lántökur)vegna reksturs eða fjárfestinga á árinu 2011.

Efnahagsreikningur og rekstrarreikningur fyrir árið 2011, var borinn upp og samþykktur.

Samþykkt var tillaga stjórnar RARIK þess efnis að ekki yrði greiddur út arður á árinu.

Sjá nánar ársskýrslu og ársreikning fyrir 2011 hér heimasíðu RARIK.

Tilnefning í stjórn RARIK ohf frá aðalfundi 2012 til aðalfundar 2013

Samþykkt var tillaga um eftirfarandi aðal- og varastjórnarmenn:

Aðalstjórn:

Árni Steinar Jóhannsson Hafnarbraut 4 Fjarðabyggð

Ingibjörg Sigmundsdóttir Heiðmörk 31 Hveragerði

Hilmar Gunnlaugsson Hamrahlíð 4 Egilsstöðum

Huld Aðalbjarnardóttir Víðisholti 1 Húsavík

Valdimar Guðmannsson Hlíðarbraut 1 Blönduósi

Varastjórn:

Ingibjörg I. Guðmundsdóttir Brekkuhvammi, Reykh.dal Borgarfirði

Þorvarður Hjaltason Sigtúnum 7 Selfossi

Berglind Hallgrímsdóttir Ásvallagötu 3 Reykjavík

Sigurður Viggósson Sigtúni 5 Patreksfirði

Jóhanna E. van Schalkwyk Borgarbraut 9 Grundarfirði

Þórhallur Arason, fulltrúi eiganda, kvaddi sér hljóðs og bar fundinum kveðju Oddnýjar G. Harðardóttur, fjármálaráðherra, sem ekki gat mætt á fundinn. Hann lýsti yfir ánægju með að hagur félagsins væri góður. Þórhallur gat þess einnig að unnið væri að eigandastefnu á vegum fjármálaráðuneytisins, en ráðuneytið fer nú með eignarhluta ríkisins í flestum félögum þess. Að lokum þakkaði hann nýendurkjörinni stjórn fyrir störf í þágu félagsins einnig þakkaði hann forstjóra og starfsmönnum RARIK fyrir árangursríkt starf.

Ársreikningur RARIK fyrir árið 2011

Fri, 02 Mar 2012 23:17:00 +0000

Samkvæmt rekstrarreikningi var hagnaður á árinu 1.014 milljónir króna en rekstrarhagnaður fyrir afskriftir, fjármagnsliði og skatta (EBITDA) var 3.520 milljónir króna eða 32,7% af veltu tíma-bilsins og samanborið við 31,5% á árinu 2010. Handbært fé frá rekstri var 2.779 milljónir króna.

Rekstrarhagnaður af starfsemi RARIK fyrir fjármagnsliði (EBIT) á árinu 2011 var 2.221 milljónir króna sem rúmlega 24% aukning frá fyrra ári og í samræmi við áætlanir. Vegna veikingar krónunnar og verðlagsbreytinga varð niðurstaða fjármagnsliða neikvæð um tæpar 1.233 milljónir króna, en var á árinu 2010 jákvæð um 56 milljónir króna.

Rekstrartekjur hækkuðu um rúm 11% frá árinu 2010 og voru 10.768 milljónir króna, en rekstrargjöld hækkuðu um rúm 8% og voru 8.547 milljónir króna.

Fjármagnsgjöld á árinu 2011 voru eins og áður segir neikvæð um 1.233 milljónir króna sem má að stórum hluta rekja til verðbólgu og veikingar krónunnar, bæði hvað varðar innlenda og erlenda lánasamninga.

Áhrif Landsnets, sem er hlutdeildarfélag RARIK, á afkomu ársins voru jákvæð um 189 milljónir króna.

Samkvæmt efnahagsreikningi voru heildareignir RARIK í árslok 37.262 milljónir króna, heildarskuldir námu 17.935 milljónum króna, eigið fé var 19.327 milljónir króna og eiginfjárhlutfall því 51,9% samanborið við 49,5% í árslok 2010.

Ársreikningur RARIK ohf. er gerður samkvæmt alþjóðlegum reikningsskilastöðlum.

Horfur

Horfur í rekstri RARIK á árinu 2012 eru ásættanlegar, en afkoman á næstu tímabilum ræðst hins vegar af almennri þróun efnahagsmála, verðlagsþróun og gengi krónunnar. Áætlanir ársins 2012 gera ráð fyrir hagnaði af rekstri félagsins í samræmi við langtíma fjárfestingaþörf í dreifikerfinu. Gjaldskrá fyrir dreifingu var hækkuð um áramótin og var hækkunin 7,5% í dreifbýli og 5% í þéttbýli. Ekki er gert ráð fyrir frekari hækkunum á árinu. Gera má ráð fyrir að við næstu hækkun þurfi enn að auka þann mun sem er á gjaldskrám í dreifbýli og þéttbýli, enda hefur RARIK ekki nýtt sér að fullu tekjuheimildir í raforkulögum við gjaldskrárgerð. Á það einkum við um gjaldskrá í dreifbýli. Vextir erlendra lána hafa verið hagstæðir undanfarin misseri og gert er ráð fyrir að þeir haldist sambærilegir út árið 2012.

Gert er ráð fyrir aukningu í fjárfestingum í dreifikerfum frá fyrra ári, en frá árinu 2008 hefur fjárfestingum verið frestað samhliða niðurskurði í rekstri félagsins vegna stöðu efnahagsmála, einkum á árunum 2009 og 2010. Til viðbótar hefðbundinni endurnýjun í dreifikerfinu verður í ár ráðist í nýtt verkefni við hitaveitu til Skagastrandar. Ekki er þörf á nýrri fjármögnun á næstu þremur árum vegna hefðbundinna fjárfestingaverkefna RARIK, þó er gert ráð fyrir sérstakri lántöku vegna hitaveituverkefnisins á árunum 2012 og 2013.

Á árinu 2012 er gert ráð fyrir að orkusala og dreifing aukist lítillega, sem er í samræmi við þróun síðustu ára.

Orkusalan.is valinn besti íslenski vefurinn

Mon, 06 Feb 2012 09:28:00 +0000

Orkusalan.is var valinn besti íslenski vefurinn á Íslensku vefverðlaunum sem Samtök vefiðnaðarins stóðu fyrir nýverið. Orkusalan er sem kunnugt er dótturfyrirtæki RARIK ohf.

Jón Gnarr, borgarstjóri Reykavíkur, afhenti verðlaunin við athöfn sem haldin var í Tjarnarbíói og voru veittar viðurkenningar fyrir framúrskarandi vefi í 11 flokkum. Alls bárust yfir 100 tilnefningar til verðlaunanna, en þetta er í 11. skipti sem Íslensku Vefverðlaunin eru haldin.

Íslensku vefverðlaunin eru uppskeruhátíð vefiðnaðarins, haldin með það að markmiði að efla hann, verðlauna bestu vefina og hvetja þá sem starfa á þessum vettvangi til dáða.

Hitaveita á Skagaströnd

Wed, 25 Jan 2012 09:46:00 +0000

RARIK ohf heldur tvo kynningarfundi um fyrirhugaða hitaveitu til Skagastrandar miðvikudaginn 1. febrúar nk.

Fyrri fundurinn verður haldinn í Skagabúð þar sem einkum verður fjallað um þann þátt framkvæmda er snýr að íbúum í dreifbýli. Til fundarins eru sérstaklega boðaðir íbúar í Skagabyggð auk þeirra íbúa Blönduóss sem búa í dreifbýlinu norðan Blönduóss. Fundurinn hefst kl. 13.00

Seinni fundurinn er í Fellsborg á Skagaströnd og á þeim fundi verður einkum fjallað um þann þátt framkvæmda er snýr að íbúum í þéttbýlinu á Skagaströnd. Fundurinn sem hefst kl. 17:30 á því einkum erindi til íbúa á Skagaströnd.

Á þessum kynningarfundum munu talsmenn RARIK gera grein fyrir
verkefninu og svara fyrirspurnum um einstaka þætti þess.

Framkvæmdir við hitaveitu

Tue, 03 Jan 2012 15:12:00 +0000

Sveitarfélagið Skagaströnd og RARIK ohf hafa gert samning um lagningu hitaveitu til Skagastrandar.

Samningurinn sem var undirritaður 30. desember 2011 felur í sér framlag sveitarfélagsins til RARIK sem mun leggja stofnæð og dreifiveitu um byggðina á Skagaströnd og tengingu við hitaveitu Blönduóss. Með framlagi sveitarfélags og sérstöku framlagi á fjárlögum ríkisins hefur arðsemi af veitunni verið tryggð.

Þegar framkvæmdum lýkur verður um að ræða eina veitu með veitusvæði sem nái yfir það svæði sem hitaveitan á Blönduósi gerir nú ásamt því sem við bætist með lagningu hitaveitunnar til Skagastrandar. Þegar framkvæmdum lýkur verður því ein gjaldskrá fyrir allt veitusvæðið.

RARIK hefur þegar boðið út efni til veitunnar og mun í framhaldi af gerð samningsins staðfesta pöntun á efni. Verklegar framkvæmdir verða boðnar út á nýju ári og munu skiptast í þrjá megin verkhluta:

• Lagningu nýrrar stofnæðar frá Reykjum að Blönduósi sem verði unnin á árinu 2012,
• Lagningu stofnæðar frá Blönduósi til Skagastrandar á fyrri hluta árs 2013
• Lagningu dreifikerfis um byggðina á Skagaströnd sumarið og haustið 2013.

Gert er ráð fyrir að fyrstu hús munu tengjast haustið 2013 og að öll hús hafi möguleika á tengingu haustið 2014.

RARIK ohf, sem hefur selt rafmagn til húshitunar á Skagaströnd undanfarna áratugi og heitt vatn til Blönduóss um árabil, fagnar þessum áfanga í viðskiptum við íbúa Skagastrandar og Blönduóss.

Ný verðskrá RARIK 1. janúar

Fri, 30 Dec 2011 17:15:00 +0000

Verðskrá RARIK fyrir dreifingu og flutning raforku hækkar nú um áramótin og er hækkunin 7,5 % í dreifbýli og 5% í þéttbýli. Þjónustustugjöld ýmis hækka jafnframt um 7,5%. Hækkunin er tilkomin vegna hækkana á tilkostnaði. Hækkun í þéttbýli er í takt við hækkun tilkostnaðar, en hækkun í dreifbýli, sem er meiri stafar af því að tekjur í dreifbýli hafa verið undir tilkostnaði undanfarin ár. RARIK hefur þrátt fyrir það haldið aftur af gjaldskrárhækkunum í dreifbýli, m.a. vegna þess að framlag til verðjöfnunar í dreifbýli hefur lækkað að raungildi. Ljóst er að gjaldskrárhækkunin þyrfti að vera meiri í dreifbýli og búast má við frekari hækkunum til viðskiptavina umfram þéttbýli á næstu árum, nema framlag til verðjöfnunar í dreifbýli verði aukið.

Ný verðskrá RARIK fyrir dreifingu og flutning mun gilda frá og með 1. janúar 2012.

Ný verðskrá RARIK fyrir innmötun raforku

Með hliðsjón af breyttri verðskrá Landsnets um flutningstöp og kerfisþjónustu, sem nýlega var tilkynnt og taka mun gildi frá og með 1. janúar nk. breytist verðskrá RARIK fyrir innmötun til samræmis, enda skylt skv. raforkulögum. Um er að ræða 24% lækkun á liðnum tapaþáttur, sjá kafla b í verðskránni. Enn fremur bætist við nýtt gjaldþrep fastagjalda til samræmis við nýlegar breytingar á raforkulögum. Þá eru einnig gerðar þær breytingar að fastagjald virkjana í minnstu stærðarflokkunum lækkar nokkuð.

Ný verðskrá innmötunar tekur gildi frá og með 1. janúar 2012.

Ljósárvirkjun færð heimamönnum að gjöf

Mon, 05 Dec 2011 15:26:00 +0000

Nú á dögunum, í tilefni 100 ára afmælis Ljósárvirkjunar, ákvað stjórn RARIK að færa heimamönnum virkjunina að gjöf.

Virkjunin er tákn um framtakssemi og djörfung Eskfirðinga í byrjun síðustu aldar er þeir réðust í virkjun Ljósár og komu raflýsingu til allra íbúa staðarins. Virkjunin markaði tímamót í sögu Austurlands og er elsta varðveitta virkjun landsins.

Stjórn RARIK þótti því við hæfi á þessum tímamótum að fela sveitarfélaginu þennan minnisvarða til varðveislu.

Ljósárvirkjun 100 ára

Fri, 11 Nov 2011 10:09:00 +0000

Ljósárvirkjun á Eskifirði er með fyrstu vatnsaflsvirkjunum á Íslandi og tók til starfa í nóvember 1911. Eskifjörður varð fyrsti þéttbýlisstaður á Íslandi þar sem allir íbúar nutu raflýsingar. Virkjunin markaði tímamót í sögu Austurlands og er elsta varðveitta virkjun landsins.

Ljósárvirkjun var byggð sem jafnstraumsvirkjun en var breytt í riðstraumsvirkjun árið 1947. RARIK yfirtók Ljósárvirkjun árið 1958. Virkjunin á 100 ára afmæli um þessar mundir og varðveitt í dag sem minnisvarði um frumkvæði heimamanna á Eskifirði.

Árshlutareikningur RARIK 2011

Tue, 30 Aug 2011 16:41:00 +0000

Rekstarhagnaður af starfsemi RARIK fyrir fjármagnsliði (EBIT) á fyrri hluta ársins 2011 var 905 milljónir króna. Rekstrarafkoman var betri en á fyrri hluta ársins 2010 og hækkuðu rekstrartekjur um rúmlega 6,6% frá fyrra ári, en rekstrargjöld með afskriftum um tæplega 4,9% og var regluleg starfsemi fyrirtækisins í samræmi við áætlanir.

Fjármagnsliðir voru neikvæðir um 981 milljón króna á tímabilinu en voru á sama tímabili árið áður jákvæðir um 248 milljónir króna. Þessi breyting stafar fyrst og fremst af veikingu krónunnar og verðbólgu sem var meiri en gert var ráð fyrir í áætlunum.

Áhrif hlutdeildarfélags á rekstur voru neikvæð um 30 milljónir króna.

Samkvæmt yfirliti um heildarafkomu var tap á tímabilinu 91 milljón króna. Rekstrarhagnaður fyrir afskriftir, fjármagnsliði og skatta (EBITDA) var 1.532 milljónir króna eða um 31% af veltu tímabilsins, samanborið við 1.356 milljónir eða 29% af veltu á sama tímabili árið áður. Hreint veltufé frá rekstri var 1.531 milljón króna samanborið við 1.571 milljón króna á sama tímabili árið 2010.

Samkvæmt efnahagsreikningi 30. júní 2011 voru heildareignir RARIK 36.604 milljónir króna og heildarskuldir námu 18.381 milljónum króna. Eigið fé var 18.223 milljónir króna og eiginfjárhlutfall 49,8%.

Árshlutareikningur RARIK ohf er gerður samkvæmt alþjóðlegum reikningsskilastöðlum.

Helstu stærðir samstæðureiknings RARIK, allar fjárhæðir í milljónum króna.

Helstu stærðir úr rekstri:

	jan-jún	jan-jún	jan-jún	jan-jún
	2011	2010	2009	2008

Rekstartekjur	4.979	4.669	4.151	3.650
Rekstrargjöld	4.074	3.884	3.514	3.295
Rekstrarhagnaður	905	785	637	355
Fjármunatekjur og (fjármagnsgjöld)	-981	248	-875	-2.280
Áhrif hlutdeildarfélags	-30	233	38	-1.007
Hagnaður/tap fyrir skatta	-106	1.266	-200	-2.932
Tekjuskattur	15	-186	36	130
Hagnaður (Tap)	-91	1.080	-164	-2.802

Eignir samtals	36.604	35.736	32.046	31.923
Eigið fé	18.223	17.062	13.777	13.941
Skuldir	18.381	18.674	18.269	17.982

Handbært fé frá rekstri	617	275	-817	1.289
Greidd vaxtagjöld	337	564	457	370

EBITDA	1.532	1.356	1.166	782
Vaxtaþekja	4,55	2,40	2,55	2,11
Eiginfjárhlutfall	49,8%	47,7%	43,0%	43,7%

Horfur í rekstri RARIK á árinu 2011 eru góðar að undanskildum fjármagnsliðum. Gert er ráð fyrir að afkoma ársins fyrir fjármagnsliði verði í samræmi við áætlanir, en heildarafkoma ársins ræðst hins vegar að verulegu leyti af þróun á gengi krónunnar og almennu ástandi efnahagsmála. Í ljósi þess að verðbólguþróun á fyrri hluta ársins og verðbólguspá næstu mánaða er hærri en gert var ráð fyrir í áætlunum, má búast við að tap verði á fyrirtækinu á árinu.

Árshlutareikningur RARIK 1. janúar til 30. júní 2011 var samþykktur á fundi stjórnar þann 29. ágúst 2011.

Nánari upplýsingar veitir Tryggvi Þór Haraldsson, forstjóri RARIK í síma 528-9000.